ملک کے مختلف شہروں میں عید پر موسم کیسا رہے گا؟ محکمہ موسمیات نے پیشگوئی کردی۔
محکمہ موسمیات نے ملک کے اکثر علاقوں میں آئندہ 4 سے 5 روزکے دوران بارش کی پیشگوئی کی ہے، اور کہا کہ آئندہ 5 روز تک ان علاقوں میں مغربی ہواؤں کے موجود رہنے کی توقع ہے۔
محکمہ موسمیات کے مطابق صوبہ خیبر پختونخوا کے اکثر علاقوں میں بھی مطلع ابر آلود رہنے اور بعض مقامات پر بارش کا سلسلہ جاری رہنے کا امکان ہے۔
راولپنڈی، اسلام آباد، مری اور اٹک میں بھی وقفے وقفے سے اتوار تک بارش کا سلسلہ جاری رہے گا، مغربی ہواؤں کے باعث لاہور، جھنگ، سیالکوٹ میں بھی بارش جاری رہنے کی توقع ہے۔
محکمہ موسمیات کے مطابق چکوال، جہلم، گجرات، حافظہ آباد اور فیصل آباد میں آندھی اور گرج چمک کے ساتھ بارش جبکہ بیشتر علاقوں میں ژالہ باری کا بھی امکان ہے۔
محکمہ موسمیات کا کہنا ہے کہ بلوچستان کے مختلف اضلاع میں عید کے دوسرے اور تیسرے روز گرج چمک کے ساتھ بارش کا امکان ہے۔
