خرطوم:دوبارہ وزارت سنبھالنے کے 6 ہفتے بعد ہی سوڈان کے وزیراعظم عبداللہ ہمدوک نے استعفیٰ دے دیا۔
غیر ملکی خبر رساں دارے کے مطابق عبداللہ ہمدوک نے ٹیلی وژن پر خطاب کے دوران مستعفی ہونے کا اعلان کرتے ہوئے کہا کہ سویلین حکومت کی بحالی میں ناکامی پر عہدہ چھوڑ رہا ہوں.
انہوں نے کہا کہ ملک کو تباہی سے روکنے کی پوری کوشش کی لیکن جو کچھ بھی کیا گیا ویسا نہیں ہوا۔
اقتدار سنبھالنے والے وزیراعظم عبداللہ ہمدوک کو اکتوبر میں گرفتار کیا گیا تھا، احتجاج پر 21 نومبر کو ہمدوک کو دوبارہ منصب وزرات عظمیٰ دیا گیا تھا۔
ایک ماہ قبل ہی ملٹری قیادت اور سیاسی رہنماؤں میں طے پانے والے معاہدے کے تحت معزول وزیر اعظم عبداللہ حمدوک کو بحال کرنے اور قید سیاسی رہنماؤں کو رہا کرنے کا فیصلہ کیا گیا تھا۔ لیکن اس معاہدے کو جمہوریت پسند جماعتوں اور ہزاروں لوگوں کی جانب سے مسترد کر دیا گیا تھا، اور مظاہرے شروع ہو گئے تھے۔
واضح رہے کہ 25اکتوبر کو سوڈانی فوج کے لیڈر جنرل عبد الفتاح برہان نے ملک میں ایمرجنسی نافذ کر کے حکومت کا تختہ الٹ دیا تھا اور وزیر اعظم عبداللہ حمدوک کو نظر بند کر کے کئی سیاسی رہنماؤں کو حراست میں لے لیا تھا۔
ملک میں مارشل لا نافذ ہونے کے بعد سے جمہوریت کے حق میں مظاہرے بھی جاری تھے اور عالمی برادری کی جانب سے بھی جمہوری حکومت بحال کرنے کے لیے مسلسل دباؤ ڈالا جا رہا تھا۔
