دبئی: متحدہ عرب امارات کی حکومت نے پاکستانی اداکارہ ثنا جاوید اور اُن کے شوہر عمیر جسوال کو گولڈن ویزا جاری کردیا۔
اداکارہ ثنا جاوید نے یو اے ای کی جانب سے ملنے والے گولڈن ویزا ملنے کی تصدیق انسٹاگرام پر خلیج ٹائمز کی خبر کا اسکرین شاٹ شیئر کر کے کی۔
انہوں نے گولڈن ویزا ملنے کو اپنے اور شوہر کے لیے اعزاز قرار دیتے ہوئے خوشی کا اظہار کیا اور متحدہ عرب امارات کی حکومت کا شکریہ بھی ادا کیا۔
عمیر جسوال نے یو اے ای کی جانب سے گولڈن ویزا ملنے کو شاندار احساس قرار دیتے ہوئے کہا کہ ’وہ اس خوشی کو الفاظ میں بیان کرنے سے قاصر ہیں‘۔
واضح رہے کہ گلوکار علی ظفر، ہمایوں سعید، فخر عالم، وسیم اکرم، شعیب ملک کے علاوہ 73 پاکستانی کاروباری شخصیات کو بھی یو اے ای نے گولڈن ویزا جاری کیا ہے۔
