نیویارک: امریکی ریاست کیلی فورنیا کے مصروف ترین کاروباری مرکز میں ہونے والی فائرنگ کے نتیجے میں 6 افراد ہلاک جبکہ نو سے زائد افراد زخمی ہوگئے ہیں۔
غیر ملکی میڈیا رپورٹ کے مطابق فائرنگ کا واقعہ کیلی فورنیا کے شہرسکرامنٹو کے تجارتی مرکز میں پیش آیا۔
محکمہ پولیس نے فائرنگ کے واقعے کی تصدیق کرتے ہوئے بتایا کہ شہر کے تجارتی حصےمیں واقع متعدد بلاکس بند کر دیئے گئے ہیں اور واقعہ کی تفتیش کا آغاز کردیا گیا ہے، اب تک حاصل معلومات کے مطابق چھ افراد ہلاک جبکہ نو سے زائد زخمی ہیں۔
سیکرامینٹوپولیس کی سربراہ کیتھرائن لیسٹر نے بتایا کہ جس وقت یہ واقعہ پیش آیا اس وقت مذکورہ مقام پر لوگوں کا کافی رش تھا۔
پولیس کے مطابق فائرنگ کا واقعہ حساس علاقے میں پیش آیا ہے، جائے وقوعہ سے کچھ فاصلے پر اہم ریاستی دفاتر اور عمارتیں موجود ہیں، جن میں سیکرامینٹوسٹی ہال اورگولڈن ون مرکز بھی شامل ہے۔
واضح رہے کہ گذشتہ دو ماہ کے دوران سیکرامینٹو فائرنگ کا یہ دوسرا واقعہ ہے، چند ہفتے قبل ایک شخص نے اسی شہر میں اپنی جان لینے سے پہلے اپنے تین بچّوں اور ایک شخص کو گولی مار کرہلاک کردیا تھا۔
