گرمی سے پریشان لوگوں کیلیے خوشخبری ہے کہ ایسا اے سی ایجاد ہوگیا ہے جو آپ ساتھ لے کر چل سکتے ہیں اور وہ آپ کو کھلے آسمان تلے ٹھنڈک پہنچاتا ہے۔
گرمی سب کو ہی بے حال کرتی ہے صدیوں پہلے لوگوں نے گرمی کا توڑ ہاتھ سے جلنے والا پنکھا نکالا تھا وقت کی تیز رفتار ترقی کے ساتھ ساتھ گرمی سے بچاو کیلیے پنکھے، ونڈو اے سی، اسپلٹ اے سی اور پورٹیبل اے سی آئے اور دنیا بھر میں لوگوں کی بڑی تعداد ان ایجادات سے مستفید ہوتی ہے۔
جدت کے اس دور میں جہاں ہر روز نت نئی ایجادات دنیا میں سامنے آرہی ہیں وہیں اب ایک ایسا ننھا منا ایئرکنڈیشن ایجاد کیا گیا ہے جو راہ چلتے، کھلے آسمان تلے، سخت لو اور سورج کی تپش میں بھی آپ کو ٹھنڈی ہوا دے کر راحت فراہم کرے گا۔
ہیڈ فون کی شکل کی طرح کا یہ اے سی وزن میں انتہائی ہلکا ہے جس کو آپ ہیڈ فون کی طرح گردن کے اطراف لپیٹ سکتے ہیں،صرف 435 گرام وزنی یہ اے سی گلے پر کسی قسم کا بوجھ نہیں بنتا اسے بچے بھی آسانی سے پہن سکتے ہیں۔
ہیڈ فون کی طرح گردن کے اطراف میں لگائے جانیوالے اس ایئرکنڈیشنڈ نظام کو میٹوراپرو کا نام دیا گیا ہے جو مسلسل گردن اور چہرے کی جانب سرد ہوا پھینکتا رہتا ہے جو پہننے والے کو جان لیوا گرمی میں لو کی تمازت سے محفوظ رکھتا ہے۔
اس ایئرکنڈیشنڈ کو جب چلایا جاتا ہے تو یہ اطراف کی گرم فضا سے 7 فارن ہائیٹ کم ٹھنڈی ہوا دیتا ہے اور پنکھا یا فین چلانے سے اطراف کی گرمی کے مقابلے میں اس کا درجہ حرارت اطراف کے درجہ حرارت سے 18 فارن ہائیٹ تک کم ہوجاتا ہے۔
اس منی ایئرکنڈیشنڈ آلے کی سب سے بڑی خوبی یہ ہے کہ اس کو اسمارٹ فون سے بھی کنٹرول کیا جاسکتا ہے۔ اس کو ایک خمیدہ پٹی کی صورت میں بنایا گیا ہے جس میں مجموعی طور پر 26 حصے ہیں جو آپس میں جڑ کر اس حیرت انگیز ایئرکنڈیشن کو تخلیق کرتے ہیں۔
اس ننھے منے اے سی میں دو ٹربو پنکھے لگائے گئے ہیں جو بہت تیزی سے گھوم کر گردن کی رگوں، چہرے اور سر کی جانب ٹھنڈی ہوا پھینکتے ہیں جس سے گرمی کا احساس کم ہوکر انسان کو ایک خوشگوار تسکین آمیز احساس فراہم کرتا ہے۔
اس کا دوسرا ماڈل پانی سے بھرا ہے جو حقیقت میں ایئرکنڈیشن ہے۔ 121 پرزہ جات کی مدد سے بنائے گئے اس اے سی میں موجود سیمی کنڈکٹر ذرات لطیف ٹھنڈک کا احساس پیدا کرتے ہیں۔ پانی کی پھوار کی وجہ سے یہ گرمی کو تیزی سے بھگاتے ہیں۔
اس اے سی کی سب سے بڑی خوبی یہ ہے کہ یہ دیگر ایئرکنڈیشنڈ کی طرح بھاری بجلی بل کی صورت میں آپ کے بجٹ پر بھاری نہیں پڑتا۔ اس کی طاقتور بیٹری ایک مرتبہ چارج ہونے کے بعد 8 گھنٹے تک چلتی رہتی ہے۔
یوایس بی کیبل سے چارج ہونے والے اس انوکھے ڈیوائس کی قیمت 159 ڈالر ہے۔ جو پاکستانی روپے میں تقریبا 29 ہزار کے لگ بھگ بنتی ہے۔
