محکمہ موسمیات نے خیبرپختونخوا کے مختلف علاقوں میں آج رات سے جبکہ صوبے کے کئی علاقوں میں کل جمعرات سے پری مون سون بارشوں کی پیشگوئی کردی ہے،جس کے مطابق خیبرپختونخوا کے بیشتر علاقوں میں وقفے وقفے سے آندھی اور گرج چمک کے ساتھ بارش کا امکان ہے ،جبکہ بارشوں کا یہ سلسلہ وقفے وقفے سے 22 جون تک جاری رہنے کا امکان ظاہر کیا گیا ہے۔
پی ڈی ایم اے کی جانب سے ضلعی انتظامیہ اور متعلقہ اداروں کو مراسلہ ارسال کر دیا گیا ہے جبکہ تیز آندھی اور بارشوں کے پیش نظر متعلقہ اداروں کو پیشگی اقدامات اور الرٹ رہنے کی ہدایات کر دی گئیں ہیں۔
پی ڈی ایم کے مطابق بالائی خیبر پختونخوا کے بعض علاقوں میں لینڈسلائیڈنگ کا خدشہ ہے۔سیاح دوران سفر احتیاطی تدابیر اختیار کریں ،موسمی صورت حال سے باخبر رہیں۔
مقامی لوگ اور سیاح خیبرپختونخوا حکومت اور مقامی انتظامیہ کی جاری کردہ الرٹس اور ہدایات پر عمل کریں۔ کسی بھی ناخوشگوار واقعے کی صورت میں مقامی انتظامیہ کے کنٹرول روم یا محکمہ سیاحت خیبرپختونخوا کی ہیلپ لائن 1422 پر رابطہ کریں۔
