پشاور: خیبر پختونخوا حکومت نے دہشت گردوں اور ان کے سہولت کاروں کے خلاف کریک ڈاؤن کا آغاز کرتے ہوئے ان کی جائیدادیں ضبط کرنے اور سرکاری نظام میں ان کے اثرات کے خاتمے کے لیے اہم اقدامات شروع کر دیے ہیں۔
محکمہ داخلہ کی جانب سے جاری اعلامیے کے مطابق صوبائی ایکشن پلان کے تحت تمام ڈویژنل اور ڈپٹی کمشنرز کو دہشتگردوں کی منقولہ و غیر منقولہ جائیدادیں ضبط کرنے کی ہدایت جاری کی گئی ہے۔ اعلیٰ سطحی اجلاس میں فیصلہ کیا گیا کہ ڈسٹرکٹ کوآرڈینیشن کمیٹیوں کے ذریعے دستیاب ڈیٹا کو اپڈیٹ اور مربوط بنایا جائے گا۔
نادرا سے دہشت گردوں کے خاندانوں کی تفصیلات حاصل کی جائیں گی، اور اگر کسی فرد کا دہشت گردی سے تعلق ثابت ہوا تو اس کے خلاف قانونی کارروائی کی جائے گی۔ اس کے علاوہ سرکاری ملازمتوں میں موجود ایسے افراد کے رشتہ داروں کی بھی جانچ ہوگی جن کے روابط دہشتگردوں سے ہو سکتے ہیں۔
آئی جی پولیس، بورڈ آف ریونیو، اسپیشل برانچ اور دیگر متعلقہ اداروں کو فوری اقدامات کی ہدایت دی گئی ہے تاکہ دہشتگردوں کے مالیاتی نیٹ ورک کو توڑا جا سکے۔
