دنیا بھر میں مقبول میسجنگ ایپ واٹس ایپ رابطے کا اہم ذریعہ بن چکی ہے، تاہم یہ کبھی کبھار الجھن کا سبب بھی بن جاتی ہے خاص طور پر اس وقت جب آپ کو کسی کے طویل وائس میسجز موصول ہونے لگیں۔
باتوں کے شوقین افراد کئی کئی منٹ طویل وائس میسج بھیج دیتے ہیں یہ جانے بغیر کہ میسج وصول کرنے والا شخص ان کے وائس میسجز سے بیزاری اور کتاہٹ محسوس کر رہا ہے۔
تاہم اب ایسے پریشان افراد کے لیے واٹس ایپ نیا فیچر متعارف کروانے جارہا ہے۔ایک رپورٹ کے مطابق واٹس ایپ نے آڈیو میسج کو ٹیکسٹ میں تبدیل کرنے کا فیچر متعارف کروا دیا ہے۔
میسج وصول کرنے والا شخص اگر وہ وائس میسج نہیں سننا چاہتا تو وہ ان کا ٹرانسکرپٹ پڑھ سکتا ہے۔
یہ تحریر صرف صارف کی ڈیوائس میں ہی سامنے آئے گی، یہ واٹس ایپ کے سرور میں محفوظ نہیں ہوگی۔فی الحال اس فیچر کو آئی فون کے لیے پیش کیا گیا ہے اور اس پر مزید کام بھی جاری ہے کیونکہ ابھی یہ فیچر بعض زبانوں اور بعض الفاظ کو ٹرانسکرپٹ نہیں کرسکتا۔
اس فیچر کو مستقل طور پر اور اینڈرائڈ ڈیوائسز کے لیے کب پیش کیا جائے گا، اس بارے میں ابھی فیصلہ نہیں کیا گیا۔
