ترکیہ میں گزشتہ ہفتے آنے والے تباہ کن زلزلے کے متاثرین کے لیے دنیا بھر سے امداد کا سلسلہ جاری ہے قطر نے فیفا ورلڈ کپ کے لیے بنائے گئے 10 ہزار موبائل گھر ترکیہ کو عطیہ کردیے ہیں۔
امریکی میڈیا کے مطابق قطر نے ترکیہ کے زلزلہ متاثرین کی امداد کے لیے گزشتہ سال فیفا ورلڈ کپ کے لیے بنائے گئے 10 ہزار موبائل گھر ترکیہ کو عطیہ کرنے کا اعلان کیا ہے اور اس سلسلے میں 350 گھروں کی پہلی کھیپ ترکیہ روانہ بھی کردی گئی ہے۔
رپورٹ کے مطابق فیفا ورلڈ کپ میں قطر نے دنیا بھر سے آنے والے شائقین فٹبال کو رہائش دینے کے لیے 10 ہزار موبائل گھر بنائے تھے۔
اس حوالے سے قطر کا کہنا ہے کہ اس کا پہلے ہی یہ منصوبہ تھا کہ ایونٹ کے اختتام پر وہ یہ گھر کسی ضرورت مند کو عطیہ کردے گا۔
ترکیہ اور شام میں 7.8 شدت کے زلزلے میں اب تک 40 ہزار سے زائد اموات ہوچکی ہیں۔ ہزاروں گھر زمین بوس ہو چکے ہیں جس کی وجہ سے لاکھوں لوگ بے گھر ہو گئے ہیں۔
بہت سے لوگ سخت سردی میں کھلے میں سونے پر مجبور ہیں۔ ملبے تلے دبے لوگوں کی تلاش تاحال جاری ہے جس کے باعث ہلاکتوں میں مزید اضافے کا خدشہ ظاہر کیا جا رہا ہے۔
یاد رہے کہ قطر اور دیگر خلیجی ممالک نے زلزلہ متاثرین کی امداد کے لیے کی جانے والی کاوشوں میں بھرپور حصہ لیا ہے۔
یو اے ای نے 10 کروڑ ڈالر کی امداد دی ہے اور ترکیہ میں سب سے بڑا فیلڈ ہسپتال بھی قائم کردیا ہے جب کہ سعودی عرب نے اب تک امدادی سامان کے 8 جہاز ترکیہ اور شام بھیجے ہیں۔
