اسرائیلی عہدیدارپہلے اعلانیہ دورے پر سعودی عرب پہنچ گئے۔
اسرائیلی وزیر سیاحت ہائیم کاتس اعلیٰ سطحی وفد کے ہمراہ منگل کے روز سعودی دارالحکومت ریاض پہنچے ہیں جہاں وہ اقوام متحدہ کے زیر اہتمام دو روزہ بین الاقوامی سیاحتی کانفرنس میں شرکت کریں گے۔
رپورٹس کے مطابق کسی بھی اسرائیلی سرکاری عہدیدار کا سعودی عرب کا یہ پہلا اعلانیہ دورہ ہے۔
اسرائیل سے روانگی سے قبل ہائیم کاتس نے کہا کہ سیاحت تمام اقوام کے درمیان اہم پل کا کردار ادا کرتی ہے۔
مختلف ممالک کے درمیان سیاحت کے فروغ سے نہ صرف قومیں ایک دوسرے کے قریب آتی ہیں بلکہ اس سے معاشی فائدے بھی حاصل کیے جاتے ہیں۔
انہوں نے مزید کہا کہ وہ ریاض میں موجودگی کے دوران کانفرنس میں شریک ممالک کے ہم منصبوں سے ملاقاتیں کریں گے جن میں عرب اور مشرق وسطیٰ کے وزراء اور عہدیداران بھی شامل ہیں۔
واضح رہے کہ اسرائیلی وزیر کا دورہ ریاض ایسے وقت میں کیا جارہا ہے جب سعودی عرب کا اعلیٰ سطحی وفد فلسطینی ریاست کے دورے پر رام اللہ پہنچ گیا ہے۔
