اسرائیل کی جانب سے فلسطین پر کی جانے والی مسلسل بمباری کے باعث ہزاروں افراد نقل مکانی کرنے پر مجبور ہوگئے اور اسی دوران ایک 13 سالہ بچے نے اپنے پالتو پرندے کے ساتھ نقل مکانی کی۔
غیر ملکی میڈیا رپورٹس کے مطابق یہ ویڈیو 13 سالہ عزمی دیاب کی ہے جو اپنا گھر چھوڑ کر خان یونس کے علاقے میں آئے ہیں۔
عزمی دیاب نے اپنے طوطے کو ساتھ لانے سے متعلق کہا 'گولہ باری انسانوں اور جانوروں میں فرق نہیں کرتی، جانور بھی انسانوں کی طرح جاندار ہیں'۔
بچے نے بتایا کہ 'جب یہ طوطا (کاکٹیل) میرے پاس آیا تو کافی چھوٹا تھا، اسے چھپانے کی غرض سے میں گھونسلہ لایا تاکہ یہ مسلسل ہونے والی شیلنگ کے نتیجے میں مر نہ جائے' ۔
عزمی دیاب کے مطابق وہ کاکٹیل سے بے پناہ محبت کرتے ہیں اور اسے تنہا چھوڑنے کا تصور بھی نہیں کرسکتے۔
بچے نے بتایا 'میں نے اسے پال کر بڑا کیا ہے اور اب یہ میرے ساتھ ہی رہتا ہے'۔
غیر ملکی میڈیا رپورٹس کے مطابق عزمی اس وقت اپنے پالتو پرندے کے ہمراہ غزہ کے علاقے یونس خان کے ایک پناہ گزین کیمپ میں رہائش پذیر ہیں۔
واضح رہے کہ غزہ پر اسرائیل کے حملوں میں شہید فلسطینیوں کی تعداد 3500 سے زیادہ ہوگئی ہے۔
فلسطینی وزارت صحت کے مطابق غزہ میں اسرائیلی حملوں سے 12 ہزار 500 افراد زخمی ہوئے ہیں، شہید ہونے والوں میں 1000 سے زائد بچے اور ہزار سے زائد خواتین شامل ہیں۔
