انقرہ: سانحہ الاحلی ہسپتال پر ترکی اور اردن نے تین روزہ قومی سوگ کا اعلان کردیا۔
اسرائیلی فوج کے الاحلی اسپتال پر انسانیت سوز حملے کے بعد دنیا بھر میں شدید غم و غصہ پایا جاتا ہے۔ مشرق وسطیٰ کے کئی ممالک میں بدھ کو سانحہ الاحلی اسپتال کے خلاف دوسرے روز بھی شدید احتجاج کیا گیا۔
غزہ کے الاحلی اسپتال پر اسرائیلی فضائی حملے میں 500 افراد کی شہادتوں کے بعد دنیا بھر میں صیہونی حکومت اور فوج کے بھیانک ترین جرم کی شدید مذمت کی جارہی ہے۔
ترکی نے فلسطین کے ساتھ اظہار یکجہتی کے لیے تین روزہ قومی سوگ کا اعلان کردیا۔ ترک صدر رجب طیب اردگان نے سے مطالبہ کیا کہ وہ اسرائیل کے “غزہ میں بے مثال مظالم” کو روکنے کے لیے کارروائی کریں۔
مشرق وسطیٰ اور شمالی افریقہ کے مختلف ممالک میں ’’یوم غصہ‘‘ منایا گیا۔ لبنان، اردن، یمن، مصر، تیونس اور مقبوضہ مغربی کنارے میں ہزاروں افراد غزہ کے شہریوں سےاظہار یکجہتی کے لیے سڑکوں پر نکل آئے۔
اردن کے دارالحکومت عمان میں ہزاروں افراد امریکی اور اسرائیلی سفارت خانوں کے باہر جمع ہوئے۔ ملک میں اسلامی جماعتوں نے عام ہڑتال کی جبکہ اردن کی حکومت نے تین روزہ سوگ کا اعلان کیا ہے۔
لبنان کے دارالحکومت بیروت میں مظاہرین کی سیکورٹی فورسز کے ساتھ جھڑپیں ہوئیں جنہوں نے امریکی سفارت خانے کے قریب ہجوم کو منتشر کرنے کے لیے واٹر کینن کا استعمال کیا۔
تیونس کے دارالحکومت میں فرانسیسی سفارت خانے کے باہر احتجاج کیا گیا۔ قاہرہ، اسکندریہ اور مصر کے دیگر شہروں میں طلباء نے اسرائیل کے فضائی حملوں کی مذمت کے لیے یونیورسٹیوں میں ریلیاں نکالیں اور نعرے لگائے۔
