واشنگٹن: حماس کی طرف سے سات اکتوبر کو اسرائیل میں حیران کن حملہ کیا گیا۔ ان حملے میں 1400 اسرائیلی ہلاک ہوگئے۔ اس بڑے حملے کے راز آہستہ آہستہ کھل رہے ہیں۔
اس تناظر میں امریکی انٹیلی جنس نے انکشاف کیا ہے کہ اسرائیل پر حماس کے حملے سے پہلے کے ہفتوں میں حماس کے سینکڑوں افراد نے ایران میں خصوصی جنگی تربیت حاصل کی ہے۔
حملے سے متعلق انٹیلی جنس معلومات سے واقف لوگوں نے یہ بات امریکی اخبار کو بتائی۔
حماس اور تحریک اسلامی جہاد کے لگ بھگ 500 عسکریت پسندوں نے ستمبر کے دوران تربیتی مشقوں میں حصہ لیا۔
ان تربیتی مشقوں کی قیادت ایران کے اسلامی انقلابی گارڈ کور کے غیر ملکی آپریشنز بازو قدس فورس کے افسران کر رہے تھے۔
امریکی حکام نے کہا کہ ایران باقاعدہ طور پر فلسطینی عسکریت پسندوں کو ایران اور دیگر مقامات پر تربیت دیتا ہے تاہم حملے سے قبل ان کے پاس اجتماعی تربیت کے کوئی اشارے نہیں تھے۔
امریکی حکام اور انٹیلی جنس سے واقف لوگوں نے بتایا ان کے پاس ایسی کوئی اطلاع نہیں ہے جس سے یہ ظاہر ہو کہ ایران نے خاص طور پر سات اکتوبر کے واقعات کی تیاری کے لیے مشقیں کی تھیں۔
