دنیا میں انٹرنیٹ پر ہر لمحے سیکڑوں کی تعداد میں سائبر حملے کیے جا رہے ہیں۔
نجی ٹی وی کی رپورٹ کے مطابق تازہ تحقیق سے پتا چلا ہے کہ دنیا میں انٹرنیٹ پر روزانہ کی بنیاد پر ہر لمحے سیکڑوں سائبر حملے کیے جا رہے ہیں۔ برطانوی سائبر سیکورٹی کمپنی نے اس سلسلے میں نئے اعداد و شمار جاری کیے ہیں، جس میں انکشاف کیا گیا ہے کہ ماہرین ہر روز تقریباً 4 کروڑ 60 لاکھ سے زائد ممکنہ طور پرسائبر حملوں کی نشاندہی کررہے ہیں۔
ٹیلی کام جائنٹس بی ٹی نامی کمپنی کے مطابق ہیکرز سائبر ڈیفنس کی کمزوریوں کی نشاندہی کرنے کے لیے آٹو میشن اور مشین لرننگ کا استعمال کرتے ہوئے انٹرنیٹ سے جڑی ڈیوائسز کی تلاش میں لگے رہے۔ گزشتہ 12 ماہ میں آئی ٹی، دفاع، بینکنگ اور انشورنس سیکٹر پر سب سے زیادہ سائبر حملے کیے گئے جب کہ خیراتی اداروں پر تقریباً 7 لاکھ 85 ہزار سائبر حملے کیے گئے۔
کمپنی کا کہنا ہے کہ ماہرین کی جانب سے ہر لمحے 530 سے زائد ممکنہ سائبر حملوں کی نشان دہی کی گئی۔اس حوالے سے خبردار کیا کہ سائبر حملوں کے اس رجحان سے تحفظات میں اضافہ ہونا چاہیے۔ بی ٹی کی جانب سے یہ اعداد و شمار سائبر سیکورٹی کے حوالے سے آگہی کے مہینے کے موقع پر شائع کیے گئے۔
