آئی سی سی ورلڈکپ کے 29 ویں میچ میں بھارت نے انگلینڈ کو جیت کیلئے 230 رنز کا ہدف دے دیا۔
لکھنؤ کے بریسبیو کرکٹ اسٹیڈیم میں کھیلے جا رہے میچ میں انگلینڈ کے کپتان جوز بٹلر نے ٹاس جیت کر پہلے بھارت کو بیٹنگ کی دعوت دی۔
بھارت نے مقررہ 50 اوورز میں 9 وکٹوں کے نقصان پر 229 رنز بنائے، کپتان روہت شرما 87 رنز بناکر نمایاں رہے۔
ٹاس کے بعد انگلش کپتان جوز بٹلر کا کہنا تھا گزشتہ میچ کھیلنے والی ٹیم کو ہی آج برقرار رکھا گیا ہے۔
بھارتی ٹیم کے کپتان روہت شرما کا اس موقع پر کہنا تھا کہ وکٹ بیٹنگ کے لیے اچھی دکھ رہی ہے اور ہم بھی ٹاس جیت کرپہلے بیٹنگ ہی کرتے، آج کے میچ کے لیے اسی ٹیم کو برقرار رکھا گیا ہے جو گزشتہ میچ کھیلی تھی۔
خیال رہے کہ بھارت ورلڈکپ کے پوائنٹس ٹیبل پر 5 میچوں میں 10 پوائنٹس کے ساتھ سر فہرست ہے جبکہ انگلینڈ کی ٹیم 5 میچوں میں 4 شکستوں کے بعد سب سے آخری نمبر پر ہے۔
بھارت کی جانب سے روہت شرما اور شبمن گل نے اننگز کا آغاز کیا لیکن 26 کے مجموعے پر شبمن گل 9 رنز بنا کر بولڈ ہو گئے جبکہ ویرات کوہلی بھی 9 گیندوں پر بغیر کوئی رن بنائے کیچ آؤٹ ہو گئے۔
بھارت کے تیسرے آؤٹ ہونے والے کھلاڑی شیریاس آئیر تھے جو 4 رنز بنا کر کرس ووکس کی گیند پر مارک ووڈ کے ہاتھوں کیچ آؤٹ ہوئے جبکہ بلیو شرٹس کو چوتھا نقصان 131 پر ہوا جب کے ایل راہول 39 رنز بنا کر آؤٹ ہوئے۔
اس کے علاوہ بھارتی کپتان روہت شرما 87 رنز بناکر پویلین لوٹے جبکہ سوریا کمار یادیو 49 اور جسپریت بمراہ 16 رنز بناکر آؤٹ ہوئے۔ جڈیجا نے 8 اور محمد شامی نے ایک رن بنایا، کلدیپ یادیو 9 رنز بناکر ناٹ آؤٹ رہے۔
بھارت نے مقررہ 50 اوورز میں 9 وکٹوں کے نقصان پر 229 رنز بنائے۔ انگلینڈ کی جانب سے ڈیوڈ ولی نے 3، کرس ووکس اور عادل رشید نے 2،2 وکٹیں حاصل کیں۔
