پاکستان تحریک انصاف (پی ٹی آئی ) کے رہنما بیرسٹر سیف نے کہا کہ انتظامیہ ہمیں اس الیکشن سے آوٹ کرنا چاہتی ہے ، ہمارے امیدوار اس وقت بہت زیادہ پریشر میں ہیں۔
الیکشن ٹرانسمیشن ”الیکشن روم” میں گفتگو کرتے ہوئے بیرسٹر سیف نے کہا ہےکہ بیرسٹر گوہر کے حلقے سے قومی اور صوبائی اسمبلی کی سیٹیں نکالیں گے، انکے حلقے میں ووٹرز ہمارے حق میں ہیں اور وہاں مقبولیت ہے۔
انہوں نے کہا کہ آج رات بھی ہمارے قومی اور صوبائی اسمبلی کے امیدواروں کو اٹھایا جارہا ہے، انتظامیہ ہمیں اس پراسس سے آوٹ کرنا چاہتی ہے ، ہمارے امیدوار اس وقت بہت زیادہ پریشر میں ہیں۔
سمجھتے تھےکہ خیبرپختونخوا میں رکاوٹیں کم ہوں گی لیکن وہاں پر بھی امیدواروں کو گرفتار کیاگیا ، اس وقت سندھ میں بھی ہمارے امیدواروں پر پریشر ہے۔
انکا کہنا تھا کہ پنجاب میں تو کھلے عام مراعات دی جا رہی ہیں اور سپورٹ کی جا رہی ہے ، سیالکوٹ میں خواجہ آصف کی مخالف ریحانہ امتیاز پر کس طرح پریشر ڈالا جا رہا ہے، پنجاب میں تو ظلم کی انتہا ہو گئی ہے ، ہمارا خیال تھا کہ خیبر پختونخواہ اس چیز سے بچا ہوا ہے لیکن ہم یہاں پر بھی مظالم سہہ رہے ہیں۔
