چیف سیکرٹری خیبر پختونخوا ندیم اسلم چوہدری نے کہا ہے کہ کرم امن معاہدے پر عملدرآمد اولین ترجیح ہے۔
کرم امن معاہدے کے حوالے سے جاری بیان میں چیف سیکرٹری خیبر پختونخوا ندیم اسلم چوہدری کا کہنا تھا کہ پاکستانی عوام اور خاص طور پر کرم کے عوام کو مبارکباد پیش کرتا ہوںکہ فریقین کے امن معاہدہ طے پا گیا ہے۔
انہوں نے کہا کہ دونوں فریقین کے علما اور لیڈرشپ کا شکریہ ادا کرتا ہوں جنہوں نے اس امن معاہدے کے اوپر دستخط کروانے میں کردار ادا کیا،کل کرم کے لئے گاڑیوں کا پہلا قافلہ سامان رسد لے کے پاڑا چنار کے لئے روانہ ہوگا ۔
چیف سیکرٹری خیبر پختونخواکا مزید کہنا تھا کہ پولیس قافلوں کی حفاظت کرے گی، دیگر قانون نافذ کرنے والے ادارے بھی معاون ہونگے ،مقامی قیادت اور قانون نافذ کرنے والے اداروں کا تعاون قابل ستائش ہے مشران نے تنازعات کو پس پشت ڈال کر امن کے قیام کی راہ ہموار کی۔
انہوں نے کہا کہ صوبائی اور وفاقی حکومت امن معاہدے کی کامیابی کے لیے مکمل تعاون فراہم کرے گی ، امن کمیٹیاں کسی بھی شرپسند کو قافلے یا معاہدے کو نقصان پہنچانے کی اجازت نہیں دیں گی۔
امن کمیٹیوں سے درخواست ہے کہ وہ حکومت اور قانون نافذ کرنے والے اداروں سے مکمل تعاون کریں ، ہم کرم کے مسائل سے مکمل آگاہ ہیں اور عوامی مشکلات کے خاتمے کے لیے امن معاہدے پر عملدرآمد اولین ترجیح ہے۔
