انسداد دہشتگری عدالت لاہورمیں نو مئی کلمہ چوک میں کینٹینر جلانے کے مقدمہ میں اہم پیش رفت سامنے آئی ہے، عدالت نے پی ٹی آئی رہنماؤں اور کارکنان پر کینٹینر نذرآتش کیس میں فرد جرم عائر کر دی۔
اے ٹی سی لاہور نے مقدمہ کے 21 ملزمان پر فرد جرم عائد کی ہے، شاہ محمود قریشی اور اعجاز چوہدری سمیت دیگر پر فرد جرم عائد کی گئی۔
سماعت کے دوران شاہ محمود قریشی سمیت دیگر ملزمان نے صحت جرم سے انکارکیا، عدالت نے ملزمان کیخلاف پراسکیوشن کے گواہان کو طلب کرتے ہوئے مزید کارروائی 17 فروری تک ملتوی کر دی۔
انسداد دہشتگردی عدالت کے جج ارشد جاوید نے کوٹ لکھپت جیل میں نو مئی کلمہ چوک میں کینٹینر جلانے کے مقدمہ سماعت کی۔
زیرحراست رہنما ڈاکٹر یاسمین راشد ، اعجاز چوہدری، محمود الرشید، عمر سرفراز چیمہ کی جیل میں حاضری مکمل کی گئی۔ مقدمات کے برضمانت ملزمان کی جیل میں حاضری مکمل کی گئی۔
کلمہ چوک پر کینٹینر جلانے کا مقدمہ نمبر 1078/23 تھانہ نصیر آباد میں درج ہے، پی ٹی آئی رہنماؤں پر بغاوت اور کارکنان کو فسادات پر اکسانے کا الزام ہے۔
اس مقدمہ میں اسلم اقبال، حماد اظہر، حامد رضا گیلان، مراد سعید، زبیر نیازی اشتہاری قرار دیے گئے، واثق قیوم، سید خان، عبد الصمد اور محمد جاوید اشتہاری ہوچکے ہیں۔
