معروف بالی ووڈ اداکارہ دیپیکا پڈوکون نے انکشاف کیا ہے کہ ماضی میں انہیں اپنی زندگی کا خاتمہ کرنے کے خیالات آ چکے ہیں۔
بھارتی میڈیا کے مطابق 39 سالہ دیپیکا پڈوکون نے ایک حالیہ انٹرویو میں ڈپریشن کا شکار ہونے اور اس پر قابو پانے سے متعلق گفتگو کی ہے۔
معروف اداکارہ نے کہا کہ میں خاموشی سے سہتی رہی، سب سے پہلے میری والدہ نے محسوس کیا کہ میرے ساتھ کوئی مسئلہ ہے، میرے ذہن میں خودکشی کے خیالات بھی آئے تھے،2014ء میں مجھے احساس ہوا کہ میں ڈپریشن کا شکار ہوں، ڈپریشن پوشیدہ ہوتا ہے، یہ نظر نہیں آتا، ہمارے آس پاس رہنے والے لوگ بھی شاید اس کے بارے میں نہیں جانتے۔
بالی ووڈ اداکارہ نے کہا کہ مجھ میں ڈپریشن کے بارے میں سب سے پہلے میری والدہ کو معلوم ہوا اور انہوں نے مجھے ماہرِ نفسیات سے مشورہ کرنے کا کہا،والدہ ممبئی مجھ سے ملنے آئی تھیں اور واپسی بنگلور جاتے وقت میرے تمام اہلِ خانہ نے مجھ سے میرے کام اور دیگر معاملات کے حوالے سے ہر قسم کے سوالات پوچھے۔
دیپیکا پڈوکون نے کہا کہ اُس وقت میں نے اُن سے کہا کہ مجھے نہیں معلوم، میں خود کو صرف بے بس اور ناامید محسوس کرتی ہوں، مجھے جینا ہی نہیں ہے۔
دیپیکا پڈوکون اداکار رنویر سنگھ کے ساتھ 14 نومبر 2018ء کوشادی کے بندھن میں بندھی تھیں۔
