معروف گلوکارہ نتاشا بیگ نے کہا ہے کہ اگرچہ ان کا فوری طور پر شادی کرنے کا ارادہ نہیں، تاہم ان کی خواہش ہے کہ وہ کسی کورین اداکار سے شادی کریں۔
نتاشا بیگ نے حال ہی میں نجی ٹی وی کے ایک مزاحیہ پروگرام میں شرکت کی، جہاں انہوں نے مختلف معاملات پر کھل کر بات کی,پروگرام کے دوران گفتگوکرتے ہوئے انہوں نے بتایا کہ ان کا آبائی تعلق ہنزہ سے ہے اور وہاں کے لوگ بہت پیار کرنے اور عزت دینے والے ہیں۔
نتاشابیگ نے کوک اسٹوڈیو میں گلوکاری کرنے کے تجربے کو یادگار قرار دیتے ہوئے کہا کہ وہ مذکورہ شو میں گلوکاری کرنے کی وجہ سے ہی مشہور ہوئیں،یہ بہت بڑا پلیٹ فارم ہے جبکہ انہیں علامہ اقبال کا کلام پڑھنے کا موقع ملا، جسے وہ اپنی خوش قسمتی سمجھتی ہیں۔
ایک سوال کے جواب میں معروف گلوکارہ نے بتایا کہ حالیہ دور میں ماضی جیسے اچھے ملی نغمے تیار نہیں ہو پا رہے، ان سے بھی ماضی جیسا کوئی اچھا نغمہ تیار نہیں ہو پا رہا جبکہ باقی گلوکار بھی ماضی جیسے نغمے نہیں بنا پا رہے، شاید اب ہر کوئی خود کو اپنے ملک میں مسائل میں گھرا ہوا محسوس کرتا ہے، جس کی وجہ سے ان کی حب الوطنی کم ہوچکی ہے، جس وجہ سے ان سے نغمے بھی نہیں بن پا رہے۔
ایک اور سوال کے جواب میں نتاشابیگ نے بتایا کہ وہ کورین زبان سیکھ رہی ہیں، کورین زبان کے متعدد الفاظ اردو اور ان کی مادری زبان بروشسکی سے ملتے جلتے ہیں، وہ کورین ڈراموں کی بڑی مداح ہیں، شروع میں بھی انہیں کوریا کے مرد اچھے نہیں لگتے تھے، انہیں بھی لگتا تھا کہ کوریا کے لڑکے بھی لڑکیوں کی طرح ہیں لیکن اب انہیں پتا چل چکا ہے کہ وہاں کے مرد اچھے ہیں۔
انہوں نے بتایا فی الحال ان کا شادی کا کوئی ارادہ نہیں، تاہم ان کی خواہش ہےکہ وہ کسی کوریا کے اداکار سے شادی کریں۔
