بہاولپور:
چیف آف آرمی اسٹاف جنرل عاصم منیر نے فوجی جوانوں کے عزم اور جنگی تیاریوں کی تعریف کرتے ہوئے کہا کہ جدید منصوبے تعلیم، آئی ٹی اور جنگی تیاریوں کے میدان میں ترقی کے لیے شروع کیے گئے ہیں۔
پاک فوج کے شعبہ تعلقات عامہ (آئی ایس پی آر) کے مطابق، جنرل عاصم منیر نے بہاولپور چھاؤنی کا دورہ کیا اور وہاں جاری آپریشنل تیاریوں کا جائزہ لیا۔
آرمی چیف کو بہاولپور کور کی آپریشنل تیاریوں اور تربیتی سرگرمیوں پر بریفنگ دی گئی، جس کے دوران انہوں نے فوجی جوانوں کی محنت، عزم اور جنگی تیاریوں کی تعریف کی۔
انہوں نے کہا کہ مؤثر تربیت ایک سپاہی کی پیشہ ورانہ ترقی کی بنیاد ہے اور جدید جنگی چیلنجز کا مقابلہ کرنے کے لیے یہ پاکستان آرمی کی ایک اہم خصوصیت ہے۔
آئی ایس پی آر کے مطابق، آرمی چیف نے سی ایم ایچ انسٹی ٹیوٹ آف میڈیکل سائنسز (سی آئی ایم ایس)، انووسٹا چولستان اور انٹیگریٹڈ کومبیٹ سمیولیٹر ارینا کا افتتاح کیا۔
انہوں نے مزید کہا کہ یہ جدید منصوبے طبی تعلیم، انفارمیشن ٹیکنالوجی اور جنگی تیاریوں میں ترقی کے لیے شروع کیے گئے ہیں۔
آرمی چیف نے بہاولپور کی مختلف جامعات کے طلبہ سے ملاقات کی اور نوجوانوں کی تعلیم و ترقی کے لیے پاک فوج کے عزم کو اجاگر کیا۔
انہوں نے طلبہ کو تعلیمی میدان میں محنت اور لگن کے ساتھ آگے بڑھنے کی ہدایت دی اور کہا کہ اپنی مہارتوں کو بڑھا کر قومی ترقی میں فعال کردار ادا کریں۔
اس موقع پر کور کمانڈر بہاولپور نے آرمی چیف کا خیرمقدم کیا۔
