بھارت کی کناڈا فلموں کی اداکارہ رانیا راؤ نے 14 کلو گرام سے زائد سونے کی اسمگلنگ کے جرم میں دوران تفتیش انکشاف کیا ہے کہ انہوں نے سونا چھپانے کے طریقے یوٹیوب سے سیکھے۔
چند روز قبل رانیا راؤ کو 12 کروڑ 56 لاکھ بھارتی روپے کی مالیت کے 14.2 کلو گرام سونا اسمگل کرنے کے الزام میں گرفتار کیا گیا تھا۔
دوران حراست ڈائریکٹوریٹ آف ریونیو انٹیلی جنس (ڈی آر آئی) کی جانب سے کی گئی پوچھ گچھ کے دوران رانیا راؤ نے انکشاف کیا کہ انہیں دبئی انٹرنیشنل ائیرپورٹ کے ٹرمینل 3 کے گیٹ اے سے سونا لینے کے لیے بذریعہ انٹرنیٹ کال موصول ہوئی تھیں، اور اس سفر سے 2 ہفتے قبل ہی غیر ملکی نمبرز سے کال آ رہی تھی جس کے بعد انہوں نے پہلی بار سونا اسمگل کیا۔
اداکارہ نے بتایا کہ انہیں ائیرپورٹ کے ڈائننگ لاؤنج میں سفید گاؤن میں ملبوس ایک نامعلوم شخص نے دو پیکٹ دیے تھے جبکہ انہوں نے سونا چھپانے کا طریقہ یوٹیوب سے سیکھا۔
ائیرپورٹ پر رانیا راؤ نے نامعلوم شخص سے سونا لینے کے بعد اسے واش روم میں لے جا کر کپڑوں میں سونے کی سلاخیں ٹیپ سے چپکا کر اسمگل کرنے کی کوشش کی تھی، اور اپنے جوتوں اور جیبوں میں بھی سونے کے چھوٹے ٹکڑے چھپا رکھے تھے۔
