مشہور ماڈل اور اداکارہ نادیہ حسین کے خلاف ایف آئی اے نے سوشل میڈیا پر بے بنیاد الزامات لگانے کے معاملے پر پیکا ایکٹ کے تحت تحقیقات کا آغاز کر دیا ہے۔
ذرائع کے مطابق نادیہ حسین نے سوشل میڈیا پلیٹ فارم پر ایک ایف آئی اے افسر کے خلاف رشوت طلب کرنے کا الزام عائد کیا تھا، جس پر ایف آئی اے حکام نے وضاحت دی کہ یہ الزام بے بنیاد اور جھوٹا ہے۔
ایف آئی اے کے مطابق، رشوت طلب کرنے والا شخص حقیقت میں کوئی افسر نہیں تھا بلکہ ایک جعل ساز تھا، جس نے ڈی پی پر ایف آئی اے افسر کی تصویر لگا کر کال کی۔ حکام نے نادیہ حسین کو ہدایت کی تھی کہ جعل ساز کے خلاف سائبر کرائم رپورٹنگ سینٹر کراچی میں شکایت درج کروائیں، لیکن اداکارہ نے بجائے شکایت درج کرانے کے، سوشل میڈیا پر بیان جاری کر دیا۔
ایف آئی اے نے بتایا کہ جعل ساز کا تعلق وہاڑی سے ہے اور اس کی گرفتاری کے لیے کوششیں جاری ہیں۔ تاہم، نادیہ حسین کے الزامات نے ایف آئی اے کی ساکھ کو متاثر کیا ہے، جو قانون کے مطابق جرم ہے۔
یاد رہے کہ نادیہ حسین کے شوہر، سابق سی ای او بینک الفلاح سیکیورٹیز عاطف محمد خان کو مالیاتی دھوکہ دہی کے الزام میں 8 مارچ 2025 کو گرفتار کیا گیا تھا۔
