پشاور: خیبرپختونخوا حکومت کی جانب سے شروع کی گئی "نشے سے پاک پشاور" مہم کے تیسرے مرحلے میں 26 افغان باشندے بحالی مراکز میں زیر علاج رہنے کے بعد مکمل صحت یاب ہو گئے ہیں۔ صحت یاب ہونے والوں میں تین بچے اور ایک خاتون بھی شامل ہیں۔
حکام کے مطابق ان افراد کو پہلے تحویل میں لے کر بحالی مراکز منتقل کیا گیا تھا جہاں ان کا مکمل علاج کیا گیا۔ صحت یاب ہونے والوں کی فہرست افغان قونصل جنرل حافظ محب اللہ شاکر کے حوالے کر دی گئی ہے۔
افغان قونصل جنرل نے کمشنر افغان پناہ گزین اور کمشنر پشاور ڈویژن ریاض خان محسود سے ملاقات کی جس میں بحالی مراکز کے منتظمین اور ڈائریکٹر سوشل ویلفیئر رفیق مہمند بھی موجود تھے۔ اس ملاقات میں صحت یاب افراد کے علاج کے بارے میں تفصیلات فراہم کی گئیں۔
حکام کے مطابق زیادہ تر افراد کے خاندان پشاور اور دیگر اضلاع میں مقیم ہیں، جنہیں افغان قونصل خانے کے ذریعے ان کے اہلِ خانہ کے حوالے کیا جائے گا۔ جبکہ کچھ افراد کے خاندان افغانستان میں ہیں جنہیں قونصلیٹ کے ذریعے اطلاع دے کر ان سے ملوایا جائے گا۔
افغان قونصل جنرل کی درخواست پر صحت یاب افراد کو مزید چند دن بحالی مراکز میں رکھا جائے گا تاکہ تمام اہلِ خانہ سے مکمل رابطہ قائم کیا جا سکے۔
قونصل جنرل نے خیبرپختونخوا حکومت اور کمشنر پشاور ڈویژن کا شکریہ ادا کرتے ہوئے کہا کہ یہ ایک عظیم انسانی اقدام ہے۔
