اسلام آباد: مرکزی رویت ہلال کمیٹی کا اجلاس 30 مارچ کو عید الفطر کے چاند کی رویت کے لیے طلب کر لیا گیا۔
چیئرمین مرکزی رویت ہلال کمیٹی مولانا عبد الخبیر آزاد کی سربراہی میں اجلاس وزارت مذہبی امور، اسلام آباد میں ہوگا، جبکہ زونل رویت ہلال کمیٹیوں کے اجلاس ملک کے مختلف مقامات پر منعقد ہوں گے۔
محکمہ موسمیات نے 31 مارچ کو عیدالفطر ہونے کا امکان ظاہر کیا ہے۔
محکمہ موسمیات کے مطابق شوال کے چاند کی پیدائش 29 مارچ کو 3 بج کر 58 منٹ پر ہوگی۔ 30 مارچ کی شام چاند کی عمر تقریباً 27 گھنٹے ہوگی اور غروب آفتاب کے بعد 70 منٹ تک آسمان پر نظر آئے گا، جبکہ عام طور پر 20 گھنٹے کی عمر کا چاند انسانی آنکھ سے واضح طور پر دیکھا جا سکتا ہے۔
حکومت پاکستان نے 31 مارچ سے 2 اپریل تک تین روزہ تعطیلات کا اعلان کیا ہے۔
