الیکشن کمیشن نے 23-2022 کے اثاثے اور گوشوارے جمع نہ کرانے پر 10 سابق ارکان اسمبلی کو نااہل قرار دے دیا ہے۔ اس فیصلے میں قومی اسمبلی کے 10 سابق ارکان کی نااہلی کا اعلان کیا گیا۔
اس فیصلے کے تحت سندھ اور بلوچستان اسمبلیوں کے 7، 7 سابق ارکان بھی نااہل قرار دیے گئے ہیں۔ الیکشن کمیشن کے مطابق، جب تک یہ ارکان اپنے اثاثوں کی تفصیلات فراہم نہیں کرتے، وہ عام، ضمنی اور سینیٹ انتخابات میں حصہ نہیں لے سکتے۔
نااہل قرار دیے گئے قومی اسمبلی کے سابق ارکان میں خرم دستگیر خان، محسن نواز رانجھا، محمد عادل، رانا محمد اسحاق خان، کمال الدین، عصمت اللہ، ثمینہ مطلوب، نصیبہ، شمیم آرا پنہور اور روبینہ عرفان شامل ہیں۔
سندھ اسمبلی کے سابق ارکان عدیل احمد، حزب اللہ بھگیو، ارسلان تاج حسین، عارف مصطفیٰ جتوئی، عمران علی شاہ، علی غلام اور طاہرہ بھی نااہل قرار دیے گئے ہیں۔ بلوچستان اسمبلی کے سابق ارکان میر سکندر علی، میر محمد اکبر، سردار یار رند، عبدالرشید، عبدالواحد صدیقی، میر حمال اور بی بی شاہینہ بھی نااہل قرار پائے ہیں۔
