بالی وڈ کی معروف اداکارہ کرینہ کپور کے افیئرز ہمیشہ بھارتی میڈیا کی توجہ کا مرکز رہے ہیں، چاہے وہ شاہد کپور کے ساتھ ان کا تعلق ہو یا نوابزادہ سیف علی خان کے ساتھ ان کی شادی۔ لیکن کیا آپ جانتے ہیں کہ ایک وقت ایسا بھی تھا جب کرینہ کپور بھارت کے ایک مشہور سیاستدان کی طرف مائل تھیں اور ان سے ملنے کی خواہش رکھتی تھیں؟
بھارتی میڈیا کی ایک حالیہ رپورٹ کے مطابق، کرینہ کپور نے سیف علی خان سے شادی سے پہلے سیمی گریوال کے ایک شو میں اس بات کا اعتراف کیا تھا۔ کرینہ نے کہا کہ وہ کانگریس کے رہنما راہول گاندھی سے ملنا چاہتی تھیں کیونکہ دونوں کا تعلق بااثر خاندانوں سے ہے۔
جب شو کے دوران کرینہ سے پوچھا گیا کہ اگر انہیں کسی کو ڈیٹ کرنے کا موقع ملے تو وہ کس کا انتخاب کریں گی، تو انہوں نے کہا کہ وہ راہول گاندھی کو ڈیٹ کرنا چاہیں گی۔ کرینہ نے مزید کہا کہ وہ راہول گاندھی کی تصویریں دیکھ کر سوچتی تھیں کہ ان سے ملنا کتنا دلچسپ ہوگا، کیونکہ ایک فلمی گھرانے اور ایک سیاسی گھرانے کے درمیان گفتگو واقعی دلچسپ ہو سکتی ہے۔
