جے یو آئی نے یہ کہا ہے کہ وزیراعلیٰ کے پی، علی امین گنڈا پور، عمران خان کی واضح ہدایات کے باوجود مولانا فضل الرحمان کے خلاف ہرزہ سرائی کر رہے ہیں، اور اس عمل سے حکومت اور غیر جمہوری قوتوں کو فائدہ پہنچے گا۔
اپنے بیان میں جے یو آئی کے ترجمان نے کہا کہ علی امین گنڈا پور تحریک انصاف اور جے یو آئی کے درمیان فاصلے بڑھانے کی سازش کر رہے ہیں۔
انہوں نے مزید کہا کہ گرینڈ اپوزیشن میں رکاوٹ ڈالنے سے حکومت اور غیر جمہوری قوتوں کو فائدہ ہوگا۔ علی امین گنڈا پور کو تحریک انصاف کا گوربا چوف قرار دیتے ہوئے کہا گیا کہ پی ٹی آئی کو بیرونی نہیں بلکہ اندرونی سازشوں سے خطرہ ہے۔
ترجمان اسلم غوری نے یہ بھی کہا کہ جب اپوزیشن اتحاد بننے کے قریب ہوتا ہے تو سازشی عناصر اپنا کام شروع کر دیتے ہیں۔ علی امین اپنی حکومت کو برقرار رکھنے کے لیے اپوزیشن اتحاد سے خوفزدہ ہیں، اور پی ٹی آئی کی قیادت کو پارٹی کے اندر سازشیوں پر نظر رکھنی چاہیے۔
انہوں نے یہ بھی کہا کہ اپوزیشن کے گرینڈ الائنس کو ہماری کمزوری نہ سمجھا جائے۔ گنڈا پور نے علماء کی توہین کرکے اپنی گھٹیا ذہنیت کا اظہار کیا ہے، کیونکہ علماء کرام انبیاء کے وارث ہیں اور ان کی توہین برداشت نہیں کی جائے گی۔ پی ٹی آئی کو وضاحت کرنی چاہیے کہ کیا علی امین کا علماء کے بارے میں بیان ان کی پارٹی کی پالیسی ہے؟
