معروف یوٹیوبر رجب بٹ، جو حالیہ تنازعات میں گھرے ہوئے تھے، نے اپنے نئے ولاگ میں انکشاف کیا کہ وہ پاکستان چھوڑ چکے ہیں۔
اپنے جذباتی ویڈیو پیغام میں رجب بٹ نے وضاحت کی کہ انہیں توہین مذہب کے الزامات کا سامنا تھا، جس کی وجہ سے انہیں ملک چھوڑنا پڑا۔ ان کا یہ تنازعہ اپنے برانڈ کے ایک متنازع پرفیوم کے لانچ کے بعد شروع ہوا، جس پر شدید ردعمل آیا۔ اگرچہ انہوں نے خانہ کعبہ کے سامنے احرام میں معافی بھی مانگی، لیکن ان کے لیے حالات مزید خراب ہوتے گئے۔
رجب بٹ کا کہنا تھا کہ وہ 23 مارچ کی رات بغیر کسی سامان کے اکیلے پاکستان سے روانہ ہوئے۔ انہوں نے کہا کہ انہیں اپنی جان کی کوئی پرواہ نہیں، لیکن اپنے والدین اور خاندان کی سلامتی کے لیے خوفزدہ تھے۔
اپنے ولاگ میں انہوں نے کہا:
"میں نے زندگی میں سب کچھ حاصل کیا، لیکن اب اپنے ہی ملک میں رہنے کی اجازت نہیں۔ سکون بھی نہیں رہا۔"
رجب بٹ نے جذباتی انداز میں کہا کہ انہوں نے غلطی کی، لیکن جب خدا معاف کر دیتا ہے تو انسانوں کی کیا حیثیت ہے؟ انہوں نے لوگوں سے معافی کی درخواست کی اور کہا کہ اگر ان کے والدین کو ان کی پریشانیوں کی وجہ سے کچھ ہوا تو وہ خود کو کبھی معاف نہیں کریں گے۔
ان کے جذباتی بیان کے بعد مداحوں نے انہیں سپورٹ کیا اور تجویز دی کہ وہ بیرون ملک ہی قیام کریں، کیونکہ پاکستان میں کامیاب ڈیجیٹل تخلیق کاروں کے لیے حالات محفوظ نہیں رہے۔
