مشہور یوٹیوبر سعد الرحمان عرف ڈکی بھائی نے سینئر اداکارہ بشریٰ انصاری کی جانب سے ہونے والی تنقید کا بھرپور جواب دے دیا۔ ڈکی بھائی ایک پوڈکاسٹ میں شریک تھے، جہاں انہیں بشریٰ انصاری کا ایک ویڈیو کلپ دکھایا گیا، جس میں وہ یوٹیوبرز پر تنقید کرتے ہوئے کہہ رہی تھیں، "یہ کون لوگ ہیں، اور کون انہیں دیکھتا ہے، میں نہیں جانتی۔" اس پر ڈکی بھائی نے فوری ردعمل دیتے ہوئے کہا، "یہ کون ہیں؟ میں انہیں نہیں جانتا، چہرہ پہچانتا ہوں، نام معلوم نہیں۔" انہوں نے کہا کہ "اب ٹیلی ویژن کا نہیں، سوشل میڈیا کا زمانہ ہے، اور جو لوگ سالوں سے ٹی وی پر کام کر رہے تھے، وہ بھی اب یہی کر رہے ہیں۔" ڈکی بھائی نے مزید کہا کہ "یہ سب اداکار اور اداکارائیں احساس کمتری کا شکار ہیں۔ میں بھی کہہ سکتا ہوں کہ اداکار کچھ نہیں کرتے، وہ صرف ہدایتکار کے اشاروں پر ناچتے ہیں۔" انہوں نے مزید کہا کہ "اداکاروں کو یوٹیوبرز کا احترام کرنا چاہیے، کیونکہ ناظرین روایتی ٹی وی چھوڑ کر ڈیجیٹل پلیٹ فارمز کی طرف بڑھ چکے ہیں۔"
