پشاور میں شادی کی تقریب سے واپس جانے والے شہریوں پر فائرنگ کے افسوسناک واقعے کی سی سی ٹی وی فوٹیج پولیس کو موصول ہو گئی ہے۔ رپورٹ کے مطابق گزشتہ روز 4 مسلح افراد نے تاک میں بیٹھ کر شہریوں کی گاڑی پر فائرنگ کی، جس کے نتیجے میں 7 افراد جان کی بازی ہار گئے، جن میں ایک راہگیر بھی شامل تھا۔
ملزمان شادی ہال کے باہر مقتولین کے باہر آنے کا انتظار کرتے رہے اور موقع پر اسلحہ لہراتے دکھائی دیے۔ پولیس نے واقعے کا مقدمہ تھانہ پھندو میں 5 ملزمان کے خلاف درج کرلیا ہے۔ ایف آئی آر میں کہا گیا ہے کہ مقتولین شادی سے واپسی پر جمیل چوک کے قریب فائرنگ کا نشانہ بنے۔ پولیس کا کہنا ہے کہ ملزمان کی گرفتاری کے لیے کوششیں تیز کر دی گئی ہیں اور جلد انہیں گرفتار کرلیا جائے گا۔
