خیبرپختونخوا حکومت نے پشاور کے حیات آباد میڈیکل کمپلیکس میں پیدائشی طور پر سماعت سے محروم بچوں کے لیے کوکلیئر امپلانٹ پروگرام کا باقاعدہ آغاز کر دیا ہے۔
یہ منصوبہ پاکستان بیت المال کے تعاون سے شروع کیا گیا ہے، اور اب صحت کارڈ پروگرام کے تحت بھی اس سہولت سے فائدہ اٹھایا جا سکے گا۔ اسپتال میں 6 ماہ سے 5 سال کی عمر کے بچوں کو جدید کوکلیئر امپلانٹ کے ذریعے سنا جانے کا موقع دیا جا رہا ہے۔
ایچ ایم سی کی ماہر ای این ٹی ٹیم اب تک نو کامیاب سرجریز انجام دے چکی ہے، جبکہ حال ہی میں دو روزہ "کوکلیئر امپلانٹ میراتھن" بھی منعقد کی گئی۔ ہر ایک سرجری پر تقریباً 21 لاکھ 50 ہزار روپے لاگت آتی ہے، جو اب حکومت اور بیت المال کی مدد سے مکمل طور پر کور کی جا رہی ہے۔
اسپتال انتظامیہ نے ٹیم کی کاوشوں کو سراہتے ہوئے کہا ہے کہ یہ قدم کئی بچوں کی زندگی میں خوشیاں واپس لے کر آئے گا۔
