پاک بھارت سرحدی کشیدگی کے باوجود افغانستان سے خشک میوہ جات سے لدے پانچ تجارتی ٹرک واہگہ کے راستے بھارت روانہ کر دیے گئے۔ سیکیورٹی ذرائع کے مطابق یہ ٹرک کئی ہفتوں سے نیشنل لاجسٹک سیل کے تحت واہگہ پورٹ پر کھڑے تھے اور اب انہیں بھارت بھیجنے کی اجازت دے دی گئی ہے۔
ذرائع کے مطابق ان ٹرکوں کو پاکستانی ڈرائیوروں نے بھارتی حدود میں منتقل کیا، جنہیں بھارتی حکام نے 24 گھنٹے کی انٹری کے لیے پرمٹ جاری کیے تھے۔
یاد رہے کہ افغان حکومت نے گزشتہ ماہ پاکستان سے درخواست کی تھی کہ واہگہ کے راستے ان کے 150 خشک میوہ جات کے ٹرکوں کو بھارت منتقل کرنے کی اجازت دی جائے۔ پاکستان نے یکم مئی کو مشروط اجازت دے دی تھی، تاہم بھارتی پرمٹس میں تاخیر اور حالیہ کشیدگی کے باعث معاملہ التوا کا شکار رہا۔
مزید افغان تجارتی سامان سے لدے ٹرک آئندہ چند روز میں بھی بھارت روانہ کیے جائیں گے۔ واضح رہے کہ اگرچہ پاک بھارت دوطرفہ تجارت 2019 سے معطل ہے، لیکن واہگہ-اٹاری بارڈر سے افغان ٹرانزٹ ٹریڈ بدستور جاری ہے۔
