پاک فوج کے شعبہ تعلقات عامہ (آئی ایس پی آر) کے مطابق، فیلڈ مارشل عاصم منیر نے بھارتی جھوٹے پراپیگنڈے کا بھرپور جواب دینے میں پاکستانی نوجوانوں اور میڈیا کے کردار کو "فولادی دیوار" قرار دیا۔
انہوں نے "معرکہ حق" اور آپریشن "بنیان مرصوص" کے دوران افواج پاکستان، عوام اور سیاسی قیادت کے ناقابل تسخیر عزم کو سراہنے کے لیے ایک عشائیہ کا اہتمام کیا۔
تقریب میں صدر پاکستان آصف علی زرداری، وزیراعظم شہباز شریف، نائب وزیراعظم/وزیر خارجہ، چیئرمین سینیٹ، اسپیکر قومی اسمبلی، وفاقی وزراء، گورنرز، وزرائے اعلیٰ، چیئرمین جوائنٹ چیفس آف اسٹاف کمیٹی، سربراہان فضائیہ و بحریہ، بڑی سیاسی جماعتوں کی سینئر قیادت، اعلیٰ سرکاری عہدیداران اور تینوں افواج کے سینیئر افسران نے شرکت کی۔
فیلڈ مارشل نے اپنے خطاب میں قومی قیادت کی حکمت عملی اور افواج پاکستان کے مابین شاندار ہم آہنگی کو سراہا، جس سے آپریشن کی کامیابی یقینی بنی۔
انہوں نے پاکستانی سائنسدانوں، انجینئرز اور سفارتکاروں کی خدمات کو بھی خراج تحسین پیش کیا۔ تقریب قومی وحدت اور اجتماعی عزم کی علامت ثابت ہوئی، جس میں قوم نے نئے حوصلے اور اتحاد کے ساتھ آگے بڑھنے کے عہد کا اعادہ کیا۔
