اسپیس ایکس نے امریکی خلائی فورس کے لیے جدید ترین جی پی ایس سیٹلائٹ "GPS III SV-08" کامیابی سے لانچ کردی ہے جو عالمی نیویگیشن سسٹم کی بہتری میں ایک اہم قدم ہے۔
سیٹلائٹ کو دوپہر 1:37 بجے کیپ کینیورل اسپیس فورس اسٹیشن، فلوریڈا سے روانہ کیا گیا۔ سیٹلائٹ اسپیس ایکس کے فالکن 9 راکٹ سے منسلک تھی۔
یہ سیٹلائٹ جدید M-Code ٹیکنالوجی سے لیس ہے، جو اسے جام ہونے سے آٹھ گنا زیادہ محفوظ بناتی ہے اور پوزیشننگ میں تین گنا زیادہ درستگی فراہم کرتی ہے۔ یہ خصوصیات خاص طور پر فوجی مقاصد کے لیے اہم ہیں۔
مزید برآں اس مشن کی خاص بات یہ ہے کہ اسے صرف تین ماہ میں مکمل کیا گیا، جو کہ قومی سلامتی کے مشنز کے لیے ایک ریکارڈ ہے۔ عام طور پر ایسے مشنز کی تیاری میں دو سال تک کا وقت لگتا ہے۔ اس تیزی سے تیاری کا مقصد جی پی ایس سسٹم کو جدید بنانا اور ممکنہ خطرات سے بچاؤ کو یقینی بنانا ہے۔
GPS III SV-08 کی شمولیت سے موجودہ جی پی ایس سیٹلائٹ کنسٹیلیشن کی کارکردگی میں نمایاں بہتری آئے گی جو دنیا بھر میں عام صارفین کو بھی زیادہ درست اور محفوظ نیویگیشن سروسز فراہم کرے گی۔
