برطانیہ اور پاکستان کے درمیان پروازیں شروع کرنے کا اعلان، شیڈول جاری

کراچی:برطانیہ اور پاکستان کے درمیان پروازیں شروع کرنے کا اعلان، شیڈول جاری کر دیا گیا  جس کے مطابق  برطانوی فضائی کمپنی  پاکستان کے لیے فضائی آپریشن کا آغاز اگلے ہفتے سے کرے گی۔

تفصیلات کے مطابق برطانوی ایئر لائن ورجن اٹلانٹک نے 13دسمبر سے پاکستان کے لیے فضائی آپریشن شروع کر ے گی، اس سلسلے میں ورجن اٹلانٹک نے پاکستان کے لیے فضائی آپریشن کا شیڈول جاری کردیا۔

 برطانیہ کی ایئر لائن ورجن اٹلانٹک پاکستان آپریشن کے لئے جدید ائیر بس اے332استعمال کرے گی، پاکستان کے لیے فضائی آپریشن شروع کرنے کی تیاریاں مکمل کرلی گئیں۔اس کے علاوہ سی اے اے کی جانب سے سلاٹ اور پروازوں کا شیڈول بھی جاری کر دیا گیا ہے۔

 سول ایوی ایشن اتھارٹی نے ورجن اٹلانٹک ایئر لائن کو پاکستان کے لیے ہفتہ وار 8پروازوں کی لینڈنگ کی اجازت دے دی۔

 سی اے اے کے ڈایکٹر ایئر ٹرانسپورٹ نے ورجن اٹلانٹک کو لاہور اور اسلام آباد کے لئے نوٹیفکیشن جاری کردیاجس کے مطابق ورجن ائرلائن کو مانچسٹر سے پاکستان کے لیے پروازوں کی اجازت نہیں دی گئی ہے۔

ایئر لائن کا سات اور 9دسمبرکو کارگو طیارہ سامان اور عملے کو لے کر لاہور پہنچے گا ورجن اٹلانٹک ایئر لائن کی پہلی پرواز 13دسمبر کو لندن سے لاہور کے لیے اڑان بھرے گی۔

مذکورہ پرواز 14دسمبر کی صبح لاہور پہنچے گی، برطانوی سفارتی عملہ اور سی اے اے کے افسران لاہور ائرپورٹ پر مسافروں کا استقبال کریں گے۔

 ورجن اٹلانٹک لندن سے لاہور ہفتہ وار 4پروازیں اور لندن سے اسلام آباد کے لئے ہفتہ وار 3پروازیں آپریٹ کرے گی، مسافروں کو لاہور اور اسلام آباد سے براہ راست لندن کے لیے ورجن اٹلانٹک ایئر ویز کی پرواز یں سفری سہولت میسر ہوگی۔