عارضہ قلب میں مبتلا لیجنڈری کامیڈین عمر شریف کی طبیعت پھر خراب ہونے کے باعث علاج کے لیے ان کی امریکا روانگی مؤخر کردی گئی جبکہ انہیں امریکا لے جانے کے لیے ایئر ایمبولینس بھی کراچی پہنچ گئی ہے۔
عمر شریف کا امریکا میں علاج کرنے والی ٹیم کے رکن پاکستانی نژاد ڈاکٹر و ماہر امراض قلب ڈاکٹر طارق شہاب نے بتایا کہ ڈائیلائسز کے دوران اداکار عمر شریف کا بلڈ پریشر کم ہوگیا تھا۔
ڈاکٹر طارق شہاب کے مطابق عمر شریف کی طبیعت خراب ہونے کی وجہ سے انہیں سی سی یو وارڈ منتقل کیا گیا۔
عمر شریف کی طبیعت بگڑنے کے بعد ڈاکٹرز کا کہنا ہے کہ وہ علاج کے لیے امریکا سفر کرنے کے قابل نہیں۔
ڈاکٹر طارق شہاب نے بتایا کہ 24 گھنٹے کے دوران عمر شریف کی طبیعت دیکھنے کے بعد ان کی روانگی کا فیصلہ ہوگا۔
علاوہ ازیں عمر شریف کے اہلخانہ کے مطابق ایئرایمبولینس کمپنی کو عمر شریف طبیعت کے بارے میں آگاہ کر دیا ہے اب روانگی کا نیا شیڈول آئے گا۔
اہلخانہ کے مطابق امریکا میں عمر شریف کے علاج معالجے کے تمام انتظامات مکمل ہیں، ڈاکٹر طارق شہاب پاکستانی ڈاکٹروں سے مسلسل رابطے میں ہیں۔
علاوہ ازیں عمر شریف کو علاج کی غرض سے امریکا لے جانے کے لیے 12 گھنٹے کی تاخیر کے بعد ایئر ایمبولینس کراچی پہنچ گئی۔
پہلے سے طے شدہ شیڈول کے مطابق عمر شریف کو آج (27 ستمبر کو) امریکا روانہ ہونا تھا۔
تاہم ڈاکٹرز کی جانب سے کیے گئے مختلف ٹیسٹ کی رپورٹ کے بعد ان کی روانگی میں تاخیر ہوسکتی ہے۔
نجی ہسپتال کے طبی ماہرین نے عمر شریف کو اگلے 24 گھنٹے فضائی سفر کرنے سے گریز کا مشورہ دیا ہے۔
عمر شریف کے بیٹے جواد عمر نے کہا ہے کہ امریکا روانگی کا فیصلہ ڈاکٹرز کی مشاورت سے کیا جائے گا۔
ذرائع کے مطابق ایئر ایمبولینس منیلا، فلپائن سے کراچی پہنچے گی، جرمنی میں ری فیولنگ کرائے گی اور پھر امریکا پہنچے گی۔
خیال رہے کہ عمر شریف کا علاج جارج واشنگٹن یونیورسٹی ہسپتال میں کیا جائے گا تاہم عمر شریف کے ساتھ اہلخانہ ایئر ایمبولینس میں سفر نہیں کر سکیں گے۔
خیال رہے کہ عمر شریف گزشتہ ایک ماہ سے علیل ہیں اور وہ کراچی کے آغا خان ہسپتال میں زیر علاج ہیں۔
