نواب شاہ:ریلوے ٹریک پر عوام ایکسپریس کو مارٹر گولوں سے تباہ کرنے کی کوشش کرنے والا مبینہ دہشت گرد گرفتار کرلیا گیا۔
نواب شاہ میں پریس کانفرنس کرتے ہوئے ایس ایس پی امیر سعود مگسی نے کہاکہ پولیس نے عوام ایکسپریس کو تباہ کرنے کی کوشش کرنے والے دہشت گرد کو گرفتار کرکے اس کے قبضے سے مارٹر گولے برآمد کر لئے ہیں۔
ایس ایس پی نے بتایا کہ گرفتار دہشت گرد کی شناخت ماجد علی کیریو عرف ببلو کے نام سے ہوئی ہے، جو ریلوے ٹریک پر عوام ایکسپریس کو مارٹر گولوں سے تباہ کرنے کی کوشش کر رہا تھا اور کارروائی کے دوران اس کے قبضے سے تین مارٹر گولے بھی برآمد کئے گئے ہیں، تاہم اس کے تین ساتھی فرار ہونے میں کامیاب ہو گئے۔
سعود مگسی نے بتایا کہ گرفتار دہشت گرد ماجد علی نے اعتراف جرم کرتے ہوئے بتایا کہ وہ ایک ماہ قبل رینجرز انٹیلی جنس کے دفتر پر بھی بم حملہ کرنے میں ملوث تھا۔
ملزم کے خلاف دہشت گردی ایکٹ کے تحت مقدمہ درج کیا جائے گا،جب کہ مزید تفتیش میں اہم انکشافات کی توقع ہے۔
