پشاور: خیبرپختونخوا حکومت نے صوبائی دارالحکومت پشاور کو منشیات کی لعنت سے پاک کرنے کیلئے ایک اہم قدم کے طور پر منشیات کے عادی افراد کی بحالی اور منشیات فروشوں کے خلاف موثر کارروائیوں کیلئے ایک جامع حکمت عملی تیار کرلی ہے۔
وزیراعلیٰ محمود خان نے حکمت عملی کی منظوری دیتے ہوئے متعلقہ حکام کو ہدایت کی ہے کہ اس حکمت عملی پر فوری طور پر عمل درآمد شروع کیا جائے۔
یہ منظوری انہوں نے جمعرات کے روز منشیات کے خاتمے کے لئے تیار کی گئی حکمت عملی کو حتمی شکل دینے سے متعلق منعقدہ ایک اعلیٰ سطح اجلاس کی صدارت کرتے ہوئے دی۔
اجلاس میں منشیات فروشوں کو سخت سے سخت سزائیں دلانے کیلئے متعلقہ صوبائی قوانین میں ضروری ترامیم کرنے کا فیصلہ کیا گیا ہے جبکہ متعلقہ وفاقی قوانین میں بھی ترامیم کیلئے معاملہ وفاقی حکومت کے ساتھ اْٹھایا جائے گا۔
ترامیم کے ذریعے منشیات فروشوں کو دی جانے والی قید کی سزا اور جرمانہ کی رقم کو بڑھایا جائے گا۔
وزیراعلیٰ کو مذکورہ حکمت عملی کے مختلف پہلوؤں اور اس پر عمل درآمد کے طریقہ کار پر بریفنگ دیتے ہوئے بتایا گیا کہ پشاور کو منشیات سے پاک کرنے کیلئے مرتب کی گئی حکمت عملی پر تین مرحلوں میں عمل درآمد کیا جائے گا۔
پہلے مرحلے میں منشیات فروشوں کے خلاف کریک ڈاؤن اور نشے کے عادی افراد کو سڑکوں اور دیگر مقامات سے اْٹھاکربحالی سنٹر منتقل کیا جائے گا۔
اس مقصد کیلئے نجی اور سرکاری شعبوں کے مختلف بحالی مراکز میں 1800 بستروں کا بندوبست کیا گیا ہے۔ پہلے مرحلے کے تحت منشیات کے عادی افراد کی بحالی کے لئے اقدامات کے علاوہ منشیات فروشوں کے خلاف منظم کاروائیاں بھی عمل میں لائی جائیں گی۔
دوسرے مرحلے میں منشیات کے عادی افراد کا علاج کرایا جائے گا۔اس کے علاوہ نشے کے عادی افراد کا مکمل ڈیٹا بیس بھی قائم کیا جائے گااور دیگر صوبوں سے آئے ہوئے افراد کو ابتدائی طبی امداد اور ڈی ٹاکسی فیکشن کے بعد متعلقہ صوبوں کو حوالے کیا جائے گا۔
مزید کنٹرول روم کے ذریعے نشے کے عادی افراد کا ہفتہ وار جائزہ لیا جائے گا۔ تیسرے مرحلے میں منشیات کے عادی افراد کو مفید شہری بنانے کیلئے انہیں ہنر سکھایا جائے گااور روزگار کے مواقع فراہم کئے جائیں گے۔
اجلاس کو آگاہ کیا گیا کہ نشے کے عادی افراد کی بحالی کیلئے تمام اقدامات کو کارآمد بنانے کیلئے ڈپٹی کمشنر پشاور کے دفتر میں متعلقہ محکموں کے نمائندوں پر مشتمل کنٹرول روم قائم کیا جائے گااور ایڈیشنل ڈپٹی کمشنر مذکورہ کنٹرول روم کا انچار ج ہو گا۔
اس کے علاوہ عوام کی رسائی کے لئے کنڑول روم کو 1052 ٹال فری نمبر بھی جاری کیا جائیگا۔ اگلے مرحلے میں اس ماڈل کو صوبے کے دیگر اضلاع تک توسیع دی جائے گی۔
