اسلام آباد: ایف آئی اے نے انکشاف کیا ہے کہ اداروں کے خلاف مہم چلانے والے زیادہ تر اکاؤنٹس کا تعلق بھارت سے تھا، اداروں کے خلاف مہم میں یورپ اور دیگر ممالک سے بھی اکاؤنٹ استعمال ہو رہے ہیں۔
ذرائع کے مطابق ایف آئی اے نے پی ٹی آئی کے کچھ سوشل میڈیا ورکرز کو حراست میں لیا ہے، تاہم تحقیقات کے دوران پی ٹی آئی کی جانب سے منظم مہم چلانے کے شواہد نہیں مل سکے ہیں۔
ذرائع کے مطابق اب تک صرف زیر حراست شفقت مقصود سے منظم مہم چلانے کے شواہد ملے ہیں، اور شفقت مقصود کا تعلق کسی سیاسی جماعت سے نہیں ہے۔
ذرائع کا کہنا ہے کہ ایف آئی اے کی جانب سے کارروائی کے لیے منظم مہم کے شواہد ضروری ہیں، ہائیکورٹ کے حکم کے مطابق ایف آئی اے بغیر نوٹس گرفتاریاں نہیں کر سکتی، اس لیے گرفتاریوں اور دفعات لگانے میں ایف آئی اے شش و پنج کا شکار ہے۔
ایف آئی اے ذرائع کا یہ کہنا ہے کہ اداروں کے خلاف مہم چلانے والے زیادہ تر اکاؤنٹس کا تعلق بھارت سے تھا، اداروں کے خلاف مہم میں یورپ اور دیگر ممالک سے بھی اکاؤنٹ استعمال ہو رہے ہیں۔
دوسری جانب سوشل میڈیا پر اداروں کے خلاف مہم چلانے والے ملزم کو عدالت میں پیش کیا گیا، ملزم شفقت مقصود 2 روزہ جسمانی ریمانڈ پر ایف آئی اے کے حوالے کر دیا گیا.
ملزم کے جسمانی ریمانڈ کی درخواست پر جوڈیشل مجسٹریٹ نے سماعت کی، ایف آئی اے نے عدالت سے ملزم کا 14 روزہ جسمانی ریمانڈ منظور کرنے کی استدعا کی تھی۔
