ایمرجنگ ایشیا کپ پاکستان کے نام

ایمرجنگ ایشیا کپ 2023 کے فائنل میں پاکستان کی اے کرکٹ ٹیم کی بھارت کے خلاف عمدہ کارکردگی پر چیمپیئنز ٹرافی 2017 کے فائنل کی یاد تازہ ہوگئی جب لارڈز کرکٹ گرانڈ میں شاہینوں نے بھارت کو ڈرامائی شکست سے دوچار کیا تھا۔گزشتہ روز سری لنکا کے شہر کولمبو میں ایمرجنگ ایشیا کپ 2023 کا فائنل میچ پاکستان اور بھارت کے درمیان کھیلا گیا، بھارتی ٹیم کے کپتان یش دھول نے ٹاس جیت کر پہلے باﺅلنگ کا فیصلہ کیا جو ان کے لیے غلط ثابت ہوا۔بھارت نے ٹاس جیت کر پاکستان کو پہلے کھیلنے کی دعوت دی اور پاکستان نے مقررہ اوورز میں 8 وکٹوں کے نقصان پر 352 رنز بناتے ہوئے بھارت کی اے ٹیم کو جیت کے لیے 353 رنز کا ہدف دیا۔ہدف کے تعاقب میں بھارت کی پوری ٹیم 224 رنز پر ڈھیر ہو گئی۔پاکستان کی جیت پر بابر اعظم، شاہد آفریدی سمیت شائقین نے ٹوئٹر پر تبصرے کیے اور پاکستانی کھلاڑیوں کی تعریف کی اور سماجی پلیٹ فارم پر مبارک ہو پاکستان ٹاپ ٹینڈ رہا۔فائنل جیتنے کے بعد پاکستان شاہینز کی ٹیم کا ہوٹل پہنچنے پر شاندار استقبال کیا گیا۔پاکستان ٹیسٹ سکواڈ کے پلیئرز نے شاہینز کا تالیاں بجاکر استقبال کیا، بابر اعظم، شاہین آفریدی ، سرفراز اور حسن علی نے نوجوان پلیئرز کو گلے لگا کر مبارک باد دی۔کرکٹرز نے جیت کا جشن روایتی انداز میں کیک کاٹ کر منایا اور پاکستان کرکٹ ٹیم کے کپتان بابر اعظم نے ایمرجنگ کھلاڑیوں کے ساتھ خوشگوار ملاقات کی اور انہیں کرکٹ سے متعلق مفید مشورے بھی دئیے۔سوشل میڈیا پر بابر اعظم سمیت دیگر کھلاڑیوں کی پاکستان ایمرجنگ کھلاڑیوں سے ملاقات کی ویڈیوز بھی وائرل ہو رہی ہیں۔ہوٹل کی لابی میں فینز بھی ایمرجنگ پاکستانی شاہینوں کو مبارک باد دینے جمع ہوئے، واضح رہے کہ پاکستان کرکٹ ٹیم کا ٹیسٹ سکواڈ سیریز کھیلنے کے لئے سری لنکا میں موجود ہے۔فاسٹ باﺅلر شاہین شاہ آفریدی نے بھی ایمریجنگ کھلاڑیوں کو مبارک باد دیتے ہوئے لکھا کہ جس طرح شاہینوں نے پورا ٹورنامنٹ بالخصوص فائنل کھیلا ہے وہ زبردست ہے، یہ وہی جنون ہے جو پوری دنیا میں ہماری کرکٹ کی نمائندگی کے لئے ہمیشہ ضروری ہے۔فخر زمان نے بھی خوشگوار موڈ میں لکھا کہ اہم میچ کے فائنل میں پہنچ کر آپ سپر سٹار بنتے ہیں، کمال کردیا لڑکو!۔ایمرجنگ کھلاڑیوں کی بھارت کے خلاف جیت پر مایاناز کھلاڑی شاہد آفریدی بھی داد دئیے بنا نہ رہ سکے، انہوں نے ٹوئٹر پر لکھا کہ پاکستان ٹیم کو ٹائٹل جیتتے دیکھ کر بہت اچھا لگ رہا ہے، پورے ٹورنامنٹ میں حیرت انگیز جذبہ دیکھنے کو ملا، طیب طاہر کی سنچری بھی دیکھنے کے قابل تھی، صائم ایوب اور صاحبزادہ فرحان کا شاندار آغاز اہم تھا، اسی جذبے کو جاری رکھیں اور آپ مزید ٹائٹل جیتتے رہیں۔بھارتی کرکٹر اور کمنٹیٹر دنیش کارتک نے بھی پاکستانی شاہینوں کی کارکردگی کی تعریف کرتے ہوئے ٹوئٹ کیا کہ اس میچ نے چیمپئنز ٹرافی 2017 کے فائنل کی یاد تازہ کر دی، جہاں پاکستان نے لارڈز کرکٹ گرانڈ میں بھارت کو 180 رنز سے شکست دی تھی۔ایمرجنگ ایشیا کپ میں پاکستان کی جیت پر صرف کھلاڑیوں نے ہی نہیں بلکہ سیاستدانوں نے بھی شاہینوں کو مبارک دی۔وزیر خارجہ بلاول بھٹو نے ایک ہی دن میں کھیلوں کی دنیا سے پاکستان کے لئے دو بڑی خوشخبریوں کا ذکر کرتے ہوئے کہا کہ مستقبل میں ہم کھلاڑیوں کی مزید کامیابیوں کے منتظر ہیں۔ایک ٹوئٹر صارف نے لکھا کہ میں 15 اکتوبر کو ہونے والے پاکستان اور بھارت کے میچ کا بے صبری سے انتظار کر رہا ہوں جب بابر اعظم پورے بھارت کے سامنے ورلڈ کپ ٹرافی اٹھائیں گے، ہمیں اپنے کھلاڑیوں اور ان کی صلاحیت پر یقین ہے کہ خدا نے چاہا تو وہ جیت کر آئیں گے۔ایک اور صارف نے لکھا کہ گزشتہ روز بھارت کی دھلائی دیکھ کر مزہ آیا۔ایک اور کرکٹ مداح نے آئی سی سی کی جانب سے جاری ون ڈے کرکٹ ورلڈ کپ کے پروموشنل ویڈیو جاری کرنے کا حوالہ دیتے ہوئے لکھا کہ آپ نے ہمیں پرومو سے ہٹایا تھا ہم نے آپ کو فائنل سے باہر کردیا۔ایک اور صارف نے طیب طاہر کی عمدہ بیٹنگ کی تعریف کرتے ہوئے لکھا پہلے سعود شکیل اور اب طیب طاہر ہمیں بچانے والے ثابت ہوئے پاکستا نی ٹیم نے میچ میں اپنے آپ کو ہر لمحے ان رکھا اور کسی بھی لمحے کھیل پر گرفت ڈھیلی نہیں ہونے دی۔ ہدف کے تعاقب میں انڈین اوپنرز نے بھی پراعتماد انداز میں اننگز کا آغاز کیا لیکن پاکستان جلد ہی پہلی کامیابی سمیٹنے میں کامیاب ہوا اور انڈیا کی پہلی وکٹ 64 رنز پر گر گئی۔خاص بات یہ تھی کہ پاکستانی باﺅلرز کے اٹیکنگ انداز نے انڈین بلے بازوں کو وکٹ پر جمنے نہ دیا اور انڈیا کی پوری ٹیم 224 رنز پر ڈھیر ہو گئی۔پاکستان کی جانب سے سفیان مقیم سب سے کامیاب باﺅلر رہے جبکہ محمد وسیم جونیئر، ارشد اقبال اور مہران ممتاز نے دو، دو وکٹیں اپنے نام کیں۔یاد رہے کہ 2019 میں ڈھاکہ میں کھیلے گئے ایمرجنگ ایشیا کپ فائنل میں پاکستان کی اے ٹیم نے بنگلہ دیش کو 77 رنز سے ہرایا تھا۔ اس ٹیم کے کپتان سعود شکیل تھے۔جو ابھی پاکستان ٹیسٹ سکواڈ کا حصہ ہیں اور انہوںنے پہلے ٹیسٹ میں شاندار ڈبل سینچری بنا کر میچ جیتنے میں اہم کردار ادا کیا تھا۔