اسپین کے نائٹ کلب میں آگ لگنے سے ہلاکتوں کی تعداد 13 ہوگئی۔
برطانوی نشریاتی ادارے بی بی سی کے مطابق اسپین کے شہر مرسیہ کے نائٹ کلب میں آج صبح اچانک آگ بھڑک اٹھی جس نے دیکھتے ہی دیکھتے عمارت کو اپنی لپیٹ میں لے لیا۔
ریسکیو حکام کے مطابق آگ لگنے سے 13 افراد کے ہلاک ہونے کی تصدیق ہوگئی ہے۔
ریسکیو حکام کا کہنا ہے کہ آگ کو چند گھنٹوں کی کوششوں کے بعد بجھا دیا گیا، امدادی سرگرمیاں جاری ہیں، آگ لگنے کی وجوہات جاننےکے لیے تحقیقات کر رہے ہیں۔
ریسکیو حکام کو خدشہ ہے کہ عمارت میں مزید افراد پھنسے ہوئے ہیں جس کی وجہ سے ہلاکتوں اور زخمیوں میں اضافہ ہوسکتا ہے۔
خیال کیا جا رہا ہے کہ اسپین کے نائٹ کلب میں لگنے والی یہ آگ ملک میں گزشتہ 30 سال کے دوران لگنے والی بدترین آگ ہے۔
اس سے قبل 1990 میں اسپین کے شہر زراگوزا میں ایک پنڈال میں آگ لگنے سے 43 افراد ہلاک ہو گئے تھے۔
