دفتر خارجہ کے ترجمان شفقت علی خان نے کہا ہے کہ پاکستان اور بنگلا دیش کے تعلقات میں بہتری کا عمل سبوتاژ کرنے کی کوششیں ناکام ہوں گی۔
انہوں نے ان رپورٹس کو مسترد کیا جو دونوں ممالک کے تعلقات کو متاثر کر سکتی ہیں، اور کہا کہ 15 سال بعد ہونے والے خارجہ سیکرٹری مذاکرات میں دیرینہ مسائل پر کھل کر بات چیت ہوئی۔ مذاکرات کا مقصد باہمی اعتماد کو فروغ دینا اور دو طرفہ تعلقات کو مضبوط بنانا تھا۔
مذاکرات میں سیاسی، اقتصادی، تعلیمی اور اسٹریٹجک تعاون پر تفصیلی تبادلہ خیال کیا گیا، اور مشترکہ تاریخی و ثقافتی پہلوؤں پر زور دیا گیا۔
ترجمان کے مطابق نیویارک، قاہرہ، جدہ اور سمرقند میں حالیہ سفارتی روابط پر اطمینان کا اظہار کیا گیا، جبکہ دونوں ممالک نے تجارت، زراعت، تعلیم اور باہمی روابط کے فروغ پر اتفاق کیا۔
بنگلادیش کے سیکرٹری خارجہ جاسم الدین نے بھی اس موقع پر کہا کہ ماضی کے مسائل کو جلد حل کر کے فلاحی اور دو طرفہ تعلقات کو مزید بہتر بنایا جائے گا۔
انہوں نے اعلان کیا کہ پاکستانی وزیر خارجہ 27 اور 28 اپریل کو بنگلادیش کا دورہ کریں گے۔
