اسلام آباد: وزیر اعظم شہباز شریف نے کہا ہے کہ حکومت جلد معیشت کی ترقی کے لیے ایک جامع پروگرام کا اعلان کرے گی۔
وزیر اعظم کی زیر صدارت کابینہ کا اجلاس ہوا، جس میں ن لیگ کے رہنما صدیق الفاروق کی مغفرت کے لیے فاتحہ خوانی کی گئی۔ اسی طرح کرک میں انسداد پولیو ٹیم کی سیکیورٹی پر مامور شہید پولیس اہلکار کے لیے بھی فاتحہ خوانی کی گئی۔
شہباز شریف نے اس موقع پر کہا کہ صدیق الفاروق نواز شریف کے قریبی اور قابل اعتماد ساتھی تھے، اور وہ ایک وفادار شخص تھے۔ انہوں نے مزید کہا کہ پولیو ورکرز جانفشانی سے اپنی ذمہ داریاں نبھا رہے ہیں۔
یونان میں پیش آنے والے کشتی حادثے پر بات کرتے ہوئے وزیر اعظم نے کہا کہ اس حادثے میں پانچ پاکستانی شہریوں کی ہلاکت ہوئی۔ انہوں نے کہا کہ غیر قانونی طریقوں سے سفر کرنا نہ صرف خطرناک ہے بلکہ اس سے قیمتی انسانی جانیں ضائع ہوتی ہیں۔ یاد رہے کہ جولائی 2023 میں بھی 260 پاکستانی کشتی حادثے کا شکار ہوئے تھے۔
وزیر اعظم نے انسانی اسمگلنگ کو ایک سنگین چیلنج قرار دیتے ہوئے کہا کہ اس مسئلے کے حل کے لیے اعلیٰ سطحی اجلاس منعقد کیا جائے گا، جس میں 2023 کے واقعے کی روشنی میں مزید اقدامات کیے جائیں گے۔ انہوں نے کہا کہ حکومت نے اس حوالے سے جامع فیصلے کیے ہیں اور ان پر سختی سے عملدرآمد کیا جائے گا۔
شرح سود میں کمی کے حوالے سے وزیر اعظم نے کہا کہ پالیسی ریٹ میں مزید 2 فیصد کمی خوش آئند ہے، جس کے بعد پالیسی ریٹ 22 فیصد سے کم ہو کر 13 فیصد تک آ گیا ہے۔ انہوں نے کہا کہ اس کمی سے ملک میں سرمایہ کاری کے مواقع بڑھیں گے۔
وزیر اعظم نے کہا کہ یہ ایک اہم موقع ہے جس میں ہم سب مل کر ملکی معیشت کو بہتر بنا سکتے ہیں۔ پالیسی ریٹ میں کمی سے سرمایہ کاروں کے لیے حوصلہ افزائی ہوگی اور معیشت کو تقویت ملے گی۔ انہوں نے کہا کہ حکومت کی ترجیح ملک میں سرمایہ کاری کو بڑھانا ہے، اور معیشت کی ترقی کے لیے جامع پروگرام کا اعلان جلد کیا جائے گا۔
