پاکستان میں منکی پاکس کا ایک اور کیس رپورٹ ہوا ہے، جس کا مریض پمز اسپتال اسلام آباد میں زیر علاج ہے۔ وفاقی حکام کے مطابق، 32 سالہ متاثرہ شخص گزشتہ روز ایک خلیجی ملک سے اسلام آباد آیا تھا اور وہ اپر دیر، خیبر پختونخوا کا رہائشی ہے۔ پمز اسپتال کے انفیکشن ڈیزیزز ڈپارٹمنٹ کے سربراہ پروفیسر ڈاکٹر نسیم اختر نے بتایا کہ متاثرہ شخص کی حالت ابھی تسلی بخش ہے۔ یہ 2024 میں پاکستان میں منکی پاکس کا آٹھواں کیس ہے۔
منکی پاکس، جو ایک جلدی بیماری ہے، پہلی بار 1970 میں جمہوریہ کانگو (DRC) میں رپورٹ ہوئی تھی۔ اس وائرس کی دو قسمیں ہیں، جنہیں کلیڈ ون اور کلیڈ ٹو کہا جاتا ہے، اور کلیڈ ٹو کو کم خطرناک سمجھا جاتا ہے۔
