راولپنڈی میں مغل مارکیٹ کے قریب سی ٹی ڈی نے بڑی کارروائی کرتے ہوئے تھانہ آئی-نائن پر حملے میں ملوث فتنہ الخوارج کے دو انتہائی خطرناک دہشت گردوں کو گرفتار کر لیا۔
ترجمان سی ٹی ڈی کے مطابق، یہ کارروائی انٹیلی جنس معلومات کی بنیاد پر کی گئی، جس میں گرفتار دہشت گرد حمزہ اور رومان شامل ہیں۔ دونوں دہشت گرد اسلام آباد اور راولپنڈی میں حساس مقامات پر حملے کے لیے ریکی مکمل کر چکے تھے۔
بیان میں مزید بتایا گیا کہ ملزمان افغانستان میں فتنہ الخوارج کے ایک اہم کمانڈر سے رابطے میں تھے۔ دہشت گردوں کے قبضے سے دستی بم، بھاری مقدار میں بارودی مواد، ڈیٹونیٹرز، سیفٹی فیوز، وائر اور دیگر تخریبی سامان برآمد کیا گیا۔ سی ٹی ڈی نے ان کے خلاف مقدمہ درج کر کے مزید تفتیش شروع کر دی ہے۔
ابتدائی تفتیش کے دوران گرفتار دہشت گردوں نے اعتراف کیا کہ چند ماہ قبل تھانہ آئی-نائن پر ہونے والے ہینڈ گرنیڈ حملے میں بھی وہی ملوث تھے۔
