پنجاب پولیس نے راجن پور کے کچے کے علاقے میں ڈاکوؤں کے خلاف بھرپور کارروائی کرتے ہوئے دو مشتبہ افراد کو گرفتار کرلیا، جبکہ دیگر ملزمان کی تلاش کے لیے آپریشن جاری ہے۔ ترجمان پنجاب پولیس کے مطابق، روجھان پولیس نے عمرانی گینگ اور لنڈ گینگ کے ڈاکوؤں کی گرفتاری کے لیے چک عمرانی میں آپریشن کیا۔ سرچ آپریشن کے دوران ڈاکوؤں کے ٹھکانوں پر چھاپے مارے گئے، لیکن پولیس کی پیش قدمی دیکھ کر کئی ملزمان دریا کے راستے فرار ہو گئے۔ تاہم، پولیس نے ان کے تعاقب کا عمل جاری رکھا۔ ترجمان نے مزید بتایا کہ آپریشن کے دوران دو مشتبہ افراد کو گرفتار کرلیا گیا، جبکہ ڈاکوؤں کی کمین گاہوں کو نذرِ آتش کر دیا گیا ہے۔ پولیس نے پورے علاقے کو گھیرے میں لے لیا ہے اور باقی مفرور ملزمان کی تلاش جاری ہے۔ ڈی پی او راجن پور کا کہنا تھا کہ کچے میں امن قائم ہونے تک آپریشن جاری رہے گا اور پولیس ہر مجرم کے خلاف بلاامتیاز کارروائی کرے گی۔ مزید اپڈیٹس کے لیے ہمارے فیس بک پیج کو فالو کریں!
