اسلامی تعاون تنظیم (OIC) نے پاکستان اور بھارت کے درمیان جنگ بندی کا خیرمقدم کرتے ہوئے کہا ہے کہ مسئلہ کشمیر سمیت تمام تنازعات کا حل بات چیت کے ذریعے ممکن ہے۔
او آئی سی کے جاری کردہ اعلامیے میں کہا گیا ہے کہ تنظیم دونوں ممالک کے درمیان چھ مئی سے شروع ہونے والی جھڑپوں کے خاتمے کو خوش آئند قرار دیتی ہے۔ اعلامیے کے مطابق جنگ بندی کا یہ عمل دس مئی کو امریکا اور دیگر ممالک کی مداخلت سے ممکن ہوا، اور اس میں کردار ادا کرنے والے تمام فریق تحسین کے مستحق ہیں۔
او آئی سی نے ایک بار پھر اس مؤقف کا اعادہ کیا ہے کہ جنوبی ایشیا میں پائیدار امن کے لیے ضروری ہے کہ مسئلہ کشمیر سمیت تمام دیرینہ تنازعات کو مذاکرات اور سفارتی ذرائع سے حل کیا جائے۔
ترجمان کا کہنا تھا کہ تنظیم اس بات پر زور دیتی ہے کہ کشیدگی کم کرنے کے لیے علاقائی و عالمی سطح پر سنجیدہ کوششیں کی جائیں اور انسانی جانوں کے ضیاع سے بچنے کے لیے تمام فریقین صبر و تحمل کا مظاہرہ کریں۔
