پاکستان کرپٹو کونسل کے سی ای او بلال بن ثاقب نے کہا ہے کہ پاکستان بلاک چین اور مصنوعی ذہانت (اے آئی) کو اپنی مستقبل کی معیشت کا مرکز بنا کر عالمی سطح پر ایک مسابقتی جدت طراز ملک بننے کے لیے پرعزم ہے۔
وزارت خزانہ سے جاری اعلامیے کے مطابق پاکستان کرپٹو کونسل کے سی ای او بلال بن ثاقب نے اسلام آباد میں قائم مقام امریکی سفیر ناتالیا بیکر سے ملاقات کی، جس میں بلاک چین، مصنوعی ذہانت اور نوجوانوں کی ترقی سے متعلق باہمی اہداف پر گفتگو کی گئی۔
ملاقات کا محور پاکستان کے باصلاحیت نوجوانوں کو ابھرتی ہوئی ٹیکنالوجیز کی مہارتوں سے لیس کرنا اور امریکی اداروں اور پاکستان کے کاروباری ماحولیاتی نظام کے درمیان روابط قائم کرنا تھا۔
کونسل نے اس عزم کا اظہار کیا کہ پاکستان بلاک چین اور اے آئی کو اپنی مستقبل کی معیشت کا مرکز بنا کر عالمی سطح پر ایک مسابقتی جدت طراز ملک بننے کے لیے پرعزم ہے۔
بلال بن ثاقب کا کہنا تھا کہ پاکستان دنیا کی سب سے نوجوان آبادیوں میں سے ایک کا گھر ہے، پرجوش، باصلاحیت، ویب تھری اور اے آئی کے مستقبل کی قیادت کے لیے تیار ہے۔
انہوں نے کہا کہ اب وقت ہے کہ ان میں سرمایہ کاری کی جائے، انہیں عالمی قائدین سے جوڑا جائے اور پاکستان اور امریکا کے درمیان مواقع کے پائیدار پل تعمیر کیے جائیں۔
ان کا کہنا تھا کہ مشترکہ پروگراموں، ٹیلنٹ ایکسچینج اور امریکی ٹیک کمپنیوں اور پاکستانی اسٹارٹ اپس کے درمیان اسٹریٹجک مفاہمتی یادداشتوں کے آغاز کی منصوبہ بندی جاری ہے۔
انہوں نے کہا کہ پاکستان کرپٹو کونسل بلاک چین کو سفارتکاری، تعلیم اور بااختیاری کا ایک مؤثر ذریعہ بنانے کے لیے پرعزم ہے تاکہ پاکستان کے نوجوان عالمی ڈیجیٹل انقلاب میں پیچھے نہ رہ جائیں بلکہ صفِ اول میں کھڑے ہوں۔
