پشاور: وزیردفاع پرویز خٹک نے کہا ہے کہ وزیراعظم عمران خان کے ساتھ کھڑا ہوں، کوئی جرات نہیں کرسکتا کہ اسمبلی میں ہماری حکومت کو گرائے۔
کوئی ان ہاؤس تبدیلی نہیں ہے، اپوزیشن سے کہتا ہوں مقابلہ کریں، سپلائی اور ڈیمانڈ برابر ہو جائے تو مہنگائی کی صورتحال بہتر ہوگی، کیا آئی ایم ایف کے پاس جانا ہمارا قصور ہے؟۔
اتوار کوپشاور میں ایک تقریب سے خطاب کرتے ہوئے وزیردفاع پرویز خٹک نے کہا کہ کوئی ان ہاؤس تبدیلی نہیں ہے، میں وزیراعظم عمران خان کے ساتھ کھڑا ہوں اور کوئی جرات نہیں کرسکتا کہ اسمبلی میں ہماری حکومت کو گرائے۔
وزیر دفاع نے کہا کہ سپلائی اور ڈیمانڈ برابر ہو جائے تو مہنگائی کی صورتحال بہتر ہوگی، کیا آئی ایم ایف کے پاس جانا ہمارا قصور ہے؟ سابقہ حکمرانوں نے پاکستان کو قرض دار بنایا ہے۔
انہوں نے کہا کہ اپوزیشن کون ہوتی ہے مجھے نوشہرہ آنے سے روکنے والی، میں نے نہ کوئی جلسہ کیا ہے نہ انتخابی مہم چلائی، اپوزیشن سے کہتا ہوں مقابلہ کریں۔
پرویز خٹک نے کہا کہ ہائی رائز بلڈنگ کے لیے منصوبہ بندی کر رہے ہیں تاہم معلوم نہیں ہائی رائز بلڈنگز بنانے پر پابندی کیوں تھی، ہمارے صوبے کو ہائی رائز بلڈنگز بنانے کی ضرورت ہے۔
